Publiskoj baļtīšu-latgalīšu vuordineicys dorba verseju
Bīdreiba „Latgalīšu volūdys centris“ publiskovuse baļtīšu-latgalīšu vuordineicys dorba verseju. Jei atrūnama puorstaipteiklā, pa adresam vuordineica.lv
Vuordineicys publiskajā sadorā vuordu varams meklēt precizai i pa šablonim, a taipoš nūruodeit viersvuordā asūša eisynovuma.
Vuordineicys dorba grupa dora pi juos jau vaira kai desmit godu i gondreiž bez pinaņsiejuma (ar nalelu i eislaiceigu KKF i Daugpiļs latgalīšu bīdreibys atspaidu). Iz itū šaļti vuordineicā irā 11421 viersvuords.
Vuordineicu sasprīsts publiskuot itaidā – nadabeigtā dorba variantā, kam jau itūšaļt jei tur gona daudzi vuordu i var byut ļaudim līteiga. Taipoš ļauds ar sovim komentarim var pīsadaleit juos taiseišonā.
Pa vuordineicys pasadareišonys leksikograpiskajai koņcepcejai, jamā līk vuordus, piec kurim rūnās vajadzeiba rokstūt pa latgaliskam, i vuordus, kurus atrūn ekspediceju materjalūs, literaturā, presā, polklorā voi cylvāku runā. Par pamatu jam Vyds i Dīnavydu Latgolys vītrunys, koč atseviškys leksiskys vīneibys īt i nu Pūstumu Latgolys i Sielejis. Vuordineicys viersvuordi irā maksimalai strukturāti, kas puordrūsynoj vuordineicys sistemiskumu i universalumu. Perspektivā paradzāts vuordineicā īvest 40-50 tyukstušys viersvuordu.
Vuordineicys publiskais sadurs padareits ar Kuļturkapitala ponda atspaidu.