Ontons Slišāns nūguo pi Pītera Miglinīka

Dīvamžāļ mes nasagaidejom vēļ tik daudz gruomotu i tik daudz cytu ideju eistynuojumu – tūs beja pylns Ontona pruotā i dvēselē! 2010.goda 15.decembrī apsatryuka darbeigs latgalīša myužs. Latgola šudiņ vairs nav taida, kaida tei beja vakar.
Pādejuo atsavadeišona nu Ontona Slišāna nūtiks 22.decembrī pl.11:00 nu Upītes Tautys noma.

Ontons dzims pieckara godūs 1948.goda 28.decembrī tūlaik vēļ Abrenes rajona Škilbānu pogosta Upītes puses Stabļovas solā. Kai jis pats sacejs: “Nazynu deļ kam, bet vysu sovu dzeivi asu bezgola mīļuots voi ari – pa laikam neists. Itei mīlesteibys i naida spēle maņ davuse vīlu dvēseles puordzeivuojumim, kū raugu izlikt iz papeira aiļu veidā. Puorsvorā sovu prīcu i suopi iz papeira izlīknu sovā dzymtajā latgaļu volūdā, kuru, par nožāluošonu, školā vuiceits natyku”.

Ontons raksteja ailis i prozu, i esejis i saceja vysu, kai ir.

Ontons Slišāns sovys pādejuos gruomotys prezentacejā Rēzeknē:

KUO VAIRUOK MAN VĀG!

Aug bārni man.
Munu volūdu runoj,
Naizsmej suopu.
Kūpā ar mani dzīd
Tautasdzīsmi.
Aug bārni man.
Tū dūmu dūmoj,
Kas muotei ryup.
Maizi tur svātu,
Par dorbu navaidūt.
Aug bārni man.
Klausuos klusuma vuordūs,
Skaļuma tyuškumu jauš
I, verūtīs ceļam iz prīšku,
Nasakaun redzēt atpakaļ.
Aug bārni man…

***
Cik ir tūs, kas mani saprūt?
Cik ir tūs, kas rūku snādz?
Cik ir tūs, kas runoj atkluoti,
Kas bolsta munus placus,
I kas dzīsmi kūpejū bez bailem dzīd?
Cik ir tūs, kas naida myura
Naceļ tautas īškīnē?
Cik ir tūs, kas dūbes narauš
Munā celē paslapyn?
Cik ir tūs, kas munai dzīsmei skanūt,
Nasuoc tai kai kraukļi kraukt?
Cik ir tūs, kas mani saprūt,
Kod es soku – Tauta sevis aizalīdz…-

***
Spieceigs naspāks
Aizbuož bolsam muti,
Atsvīž dūmu atpakaļ golvā,
Atsper vītā īsoktū sūli iz prīšku,
Pīmini ītyn putekļu dečē,
Laiku nūpyuš kai sveci,
Grybasspāku kai šķiersta naudu
Ībuož zečē…
Nyu-varam nūmiert,
Asam tam sagataveiti.

LIKTIŅAM

As tyku pagraudots-
Tu padevi man rūku.
As tyku pasysts zemē-
Tu mani pacieli,
As bezspieceigi atsadevu
Navarei, kas acīs ņirdze-
Tu sauli pasvīdi viers golvys
I grīzis dzīsmi īlaidi man kryutīs.
Ņyu, otkon asu tys,
Kas nanūstuoj i napīkyust…

***
Es zynu tik tū,
Ka pīminē tureišu svātu
Vysu tū,
Kū muna muote ar tāvu
Turēja pīminē sovā
I sauce par svātu.
Es zinu tik tū,
Ka neisšu bez gola
Vysu tū,
Kas muotes i tāva pīminē
Man īnaida sāklu īsēja.
Es zynu tik tū,
Ka myužam palikšu tī,
Kur muni bārni dzims,
Kur muni bārni rūk-rūkā ar mani
Dzymtas kopukolnā pučes sēs.

Seikuoku informaceji par Ontona Slišāna pavadeišonu LaKuGa.LV publicēs izreiz, kod byus kas vairuok zynoms.