Ministru prezidents atbaļstejs latgalīšu volūdys dorba grupys izveidi
Izgleiteibys i zynuotnis ministrejai (IZM) ir nūsyuteits Ministru prezidenta reikuojums izveiduot dorba grupu, kurai juoizstruodoj prīšklykumi reiceibys programai, kab latgalīšu volūda varātu sajimt konkretu statusu vaļsts volūdys politikys kontekstā.Dīvamžāl nav skaidreibys par Latvejis regionalūs i mozuok runuotūs volūdu savīneibys (LatBLUL) ūtra prīšklykuma virzeibu, kas izsaceits tymā pošā īsnāgumā (registrāts Vaļsts kancelejā 20. majā) – nuokamajā tautys skaiteišonā nūskaidruot latgalīšu i lībīšu volūdys lītuotuoju faktiskū skaitu. Tam vajadzeigi tik neleli lobuojumi tautys skaiteišonys anketā, sovukuort tuos saturs saraksteits attīceigajūs Ministru kabineta (MK) nūsacejumūs.
Tautys skaiteišana nūtiks cytugod, nūteik sagataviešonys dorbi, deļtuo LatBLUL aicynoj itū vaicuojumu naatlikt i izrunuot jau tyvuokajā MK sēdē. Ir svareigi atspākuot ministreju puorstovu vairuoku godu garumā turātū argumentu par naesūšim statistikys datim i gols golā juoteik skaidreibā par Latvejis pamatīdzeivuotuoju volūdu lītuojuma kvantitativajim ruodeituojim.
LatBLUL izsoka cereibu, ka, atbylstūši volūdys lykuma 3. panta 4. daļā nūruodeitajam vaļsts pīnuokumam, Latvejā pa eistam tiks nūdrūšynuota latgalīšu rokstu volūdys kai viesturiska latvīšu volūdys paveida saglobuošona, aizsardzeiba i atteisteiba.
Itū Latvejis regionalūs i mozuok runuotūs volūdu savīneibys (LatBLUL) iniciativu atbolsta: “Latgalīšu volūdys, literaturys, kulturviesturis školuotuoju asociaceja”, Latgolys Studentu centrs, bīdreiba „Kukuži”, bīdreiba “Latgalīšu Etnokulturys centrs”, bīdreiba „Es Latgalei”, Latgolys tradicionaluos kuļturys centrs „Latgaļu sāta”, bīdreiba “Upītes jauniešu folkloras kopa”, Latgolys producentu grupa i.c.
