“Latgalīts Latgalīšam Draugs” ari pa leitu
![](https://lpr.gov.lv/wp-content/uploads/2010/laladra-22-juni/2348.jpg)
Jau vairuokus godus dažaiduos Latgolys vītuos i vysaiduokūs laikūs teik reikuoti pasuokumi “latgaliskā stilā”, lai popularizietu latgalīšu volūdu i tymā radeitūs muokslys dorbus. Tai 22.juņa vokorā Bukmuižā tyka sareikuots kuortejais “LaLaDra”.
Koč ari leits drusku izjauce planus i daudzeji īprīšk īsarast sūlejūšī muokslinīki sovu daleibu atsauce, stypruokī vysleidz īsarade: Arnis Slobožanins nu muzykys grupys “Dabasu Durovys”, muzykanti nu grupys “New Buzz”, grupa “Out of Horizon” gondreiž pylnā sastuovā, tai pat ari modernuo folka jaunīšu grupa “Dyrbyni” nu Daugovpiļs nūvoda, literats Oskars Orlovs (Raibais Suņs), sovys dzīsmes sadzīdova ari Ezernīku folklorys kūpa “Akmineica” i muzykalu prīšknasumu veļteja garmanis meistars Pīters Matuļs. Kūpā kocerts ilga divejis stuņdis.
Nūslāgumā pasuokuma dalinīkus prīceja DaGunchi, Kips i Aija nu grupys “Bez PVN”. Paļdis visim, kas nanūsabeida nu leita i cytu god 22.junī “LaLaDra” otkon teik tradicionali planavuots Bukmuižā! Visi laipnai gaideiti!