Latgalīša pādi iz pasauļa
![](https://lpr.gov.lv/wp-content/uploads/2007/pasuokumi/2373.jpg)
Pyrmū “Latgalīša pādi pasaulī” vokoru kai “īsiļdeituoja” atkluoja Laura Putāne, kas sovā laikā vadiejuse Latgolys Radejis programu “Čaja vokors”, a niu jau puora godus par sovu sātu sauc Vuoceju, kur struoduojuse kai breivpruoteigais jaunīšu centrā mozā piļsieteņā Nagoldā, a niu struodoj jaunīšu organizacejā Štutgartē i tī ari dzeivoj. Laura vaira pastuosteja par sovu dorbu – jei organizej taidys kai dorba nūmetnis jaunīšim nu vysa pasauļa: jaunīši sabrauc kaidā piļsātā i, strodojūt nedeli ci vaira, padora kaidu lobu dorbu, pīvadumam, īkuortoj i sakūp piļsātys parku. Laura zynuoja saceit, ka Eiropā i cytur iz pasauļa itaidys nūmetnis jaunīšim ir cīši popularys i itūgod vairuokys tikšūt organizeitys i Latvejā.
Ūtrs vokora stuostnīks tyka gaideits ar eipašu napacīteibu: Guntis ir puorlīcynuots Latvejis Universitatis “fizmats”, aktivs latgalīts, pasauļa īkaruotuojs, daudzim pazeistams kai Šmikucs. Jis ituo goda suokumā treis mienešus pavadeja breivpruoteiguo dorbā Kazahstanā, kur školuos vuiceja angļu volūdu, tok leidza pedagoga gaitom izbaudeja i Kazahstanys kuļturys i dobys koloritū byuteibu. Interesanta fotostuosta veidā klauseituoji tyka īpazeistynuoti ar Kazahstanys sovpateibom i juo pīdzeivuojumim ari tīpat sābru zemē – Tadžikistanā, kur Guntis devēs piec breivpruoteiguo dorba beigu. Klauseituoji izzynuoja par Kazahstanys zīmu skorbumu, cenom i dzeivis leimini, vītejim školānim i studentim, vaļsts dzeivis īskotim i biznesa “taiseišonys” principim, kai ari Guntis lobpruot deve sovpateigu Latvejis i Kazahstanys saleidzynuojumu.
Piec obeju stuostu nūsaklausiešonys skaidrs ir vīns – aktivs i darbeigs latgalīts napagaiss nivīnā pasauļa molā!
Tai kai LgSC bīdri puorsvorā ir aktivi jaunīši, kas regulari īsasaista vysaidūs interesantūs pīdzeivuojumūs, brauc ekspedicejuos i apceļoj vysaidys tyvys i tuolejis zemis, ir dūmuots, ka stuostu vokori “Latgalīša pādi pasaulī” klius par tradiceju i īpazeistynuos ar daudzu cytu pasauļa valstu, kuruos bejuši latgalīši, kuļturu sovpateibom!