La-La-Dra pyrmū reizi izskaniejs ari Rēzeknē

Kūpeibys sajiuta, latgalisks gors i īdvasmojūša nūskaņa ir tī atslāgvuordi, kas raksturoj pyrmū reizi Rēzeknē 16. febralī nūtykušū pasuocīni „La-La-Dra”. Literari muzykalais pasuocīņs „La-La-Dra” ci „Latgalīts Latgalīšam Draugs” ir radūša sasatikšonys vīta gon jaunajim prozys i dzejis raksteituojim, gon muzykantim.

Pasuocīnī Rēzeknē daleibu jēme dzejis i prozys raksteituoji Baiba, Jurs Viļums, Aigars Jaundžeikars, Mārīte Krasnobaja, Ilze Vaivode, Inga Kaļva, Karonhisake, raibīS suņS i muzykanti ‑ Rēzeknis piļsātys Kulturys noma folklorys kūpa „Vīteri”, Santa Viša, Laura Kalvāne, Vilnis Dunskis, Dainis Adijāns i visim Latgolā labi zynomais Da Gunchi.

Cik energiski i ekspresīvi folklorys nūskaņuos aizasuoce pasuocīņs, tik draudzeigi cīšā i aizkustynūšā nūskaņā ar Da Gunchi dzīsmem ari nūsaslēdze. Sovukuort izmontojūt myusu dīnu tehnologeju īspiejis, ari tyukstuša kilometru nabeja škierslis Raibajam Suņam jimt daleibu Rēzeknis „La-La-Dra” i sajimt aplausus, kas apdadzynoj kai korsta eleja.

Literari muzykalīs pasuocīņs „La-La-Dra” ci „Latgalīts Latgalīšam Draugs” da šam beja vīna nu īvārojamuokojom bīdreibys „Latgolys Studentu centrs” aktivitatem Daugovpiļs pusē jau nu 2005. goda. Ir skaidrs, ka arī turpmuok Daugovpilī, Rēzeknē, Reigā un citvīt Latgolā itaids pasuocīņs ir perspektivs.

Pasuocīni reikova bīdreiba „Latgolys Studentu centrs” sadarbeibā ar Rēzeknis Augstškolys Pedagogejis fakultatis Studejūšūs pošpuorvaļdi. Pasuocīni informativi atbaļsteja LaKuGa, MadeinLatgola.lv, Vietējā Latgales Avīze, Latgales Radio. Paļdis kofejneicai „Olmāra” par uzjimšonu i grupai „Marchello” par balli pasuocīņa nūslāgumā!