Kū leluoks puordzeivuojums, tū lobuoka dzīsme.

Latgola i Latveja jū īpazyna kai grupys Borowa Mc gitaristu i dzīšmu autoru. 2009. godā Ingars Gusāns sevi pasauļam dasacieja kai Sovvaļnīks – pīpyldūt seņ carātu sapynu par sovu solo albumu “Sūpluok”.

Albums “Sūpluok”, veiksmis topūs, muziciešona ari uorpus Latvejis, video klips. Kaids Tev pošam ruodīs 2009. gods?

Dzeivē juprūjom daudzys lītys nūteik tod, kod vaira eipaši nagaidi. Beju īsuocs Sovvaļnīka albumu i nazynuoju, voi pītiks leidzekļu dabeigt, bet redz – lobi cylvāki paleidzēja i CD īraudzieja dīnys gaismu. Sevkurā gadejumā asu pateiceigs daudzim cylvākim – Andrim Linužam, Ilgai Šuplinskai, Aivaram Līpenītim, Gintam Stankevičam i.c. par tū, ka pīsapiļdēja vīns mozs sapyns – Sovvaļnīka aļbums „Sūpluok”. Attīceibā iz koč kū vaira – Latvejā ir gryuši pretendēt ar latgalīšu volūdu, koč ari teišom pabeju dažūs topūs, pabeju uorzemēs puorstuovūt latgalīšu volūtu, sajiemu pozitivys atsauksmis nu Latvejas žurnalistim i muzykas pasauļa darbinīkim, bet maņ vīnkuorši pateik tys, ka es sateiku cylvākus, kuri pasoka, ka jim pateik tys, kū es doru. Tys varātu byut cālūņs nanūlikt gitāru molā, bet dažu reizi vēļ kū ni sacerēt. Koč ari vacums vaira nav tys, i ari dorbs prosa daudzi laika, leidz ar tū muzyka ir teiri hobejs, kod palīk laiks, nu tuo palīk arviņ mozuok.

Saceji, ka ar latgalīšu volūdu pagaidom Latvejā muzykā ir kai ir, tod nu kurīnis Tev taida gryba īt tai kai drusku pret kolnu? Tev tai bīži saīt – izavēlēt na vīgluokī celi?

Vīnkuorši asu saprats, ka latgalīšu volūda labi skaņ, leidz ar tū ari vēlme paruodeit cytim, ka tys teišom tai ir. Caru, ka byus laiki, kod Latvejā ari tū nūviertēs na tikai kai mūdis klīdzīņu, bet ari kai muokslu. Kai soka muna draudzine, kotrs muokslenīks ir sova veida dekabrists, kas mieginoj īt sovu ceļu i, prūtama līta, par tū ari moksoj – dažu reizi ari cīš duorgi, bet tei ir kotra poša izvēle – īt voi naīt.

Kai i kod Tu sev atkluoji muzykys pasauļu?

Pīmiņu, ka mama gribieja, kab vuicūs muzykys školā – tys beja bārnuduorza laikūs, bet mani napajiema – nabeja lobys bolss i ritma izjiutas. Muosa tymā laikā jau klausejuos muzyku i pierka platis i, pasasokūt jai, es īpazynu disko muzyku i tod ari saprotu, ka maņ muzyka ījims cīš nūzeimeigu vītu dzeivē. Nu 6-7 godu vacuma es suoku klauseitīs cīš daudz i dažaidys muzykys i klausūs vēļ arviņ, prīškrūku tāņ gon dūdūt rokam i metalam.

Kas ir Tovi muzykalī īdvasmys olūti?

Muni olūti ir munys sajiutys i, maņ ruodīs, ka doba. Man cīš pateik pavadeit laiku pi azarim, i mežūs, i maņ vysod līkuos, ka taišni piec tom es koč kū izrokstu. Sovu reizi ir vīnkuorši sajiuta, ka koč kas laužas iz uoru i ka vāga tū pamieginot pīraksteit, i tai dažu reizi saīt dzīsme, dažu – vīnkuorši kaidi akordi. Tys laikam atkareigs nu puordzeivojuma leluma, kū leluoks puordzeivuojums, tū lobuoka dzīsme.

Ar kū Ingars atsaškir nu Sovvaļnīka?

Ingars ir kuorteiguoks i apdūmeiguoks, bet Sovvaļnīkam jau ir rakstureigi daži sovvaļnīcismi gon uzvedeibā, gon dzeivis uztverē, bet cytaiž – Sovvaļnīks ir vīnkuorši ideals pseidonims, kas principā atkluoj munu byuteibu, deļ tuo maņ pošam gryuši nūdaleit, kur beidzas Ingars i kur suokas Sovvaļnīks.

Kas ir svareiguokais Tev pošam Tovā reitdīnā? Kai Sovvaļnīkam, Ingaram?

Byušu naoriginals. Tai kai maņ ir dāls, tod maņ svareigi, kab jis augtu paieds i padziers, par tū maņ svareigi ir turpynuot struoduot. Kai Sovvaļnīkam i Ingaram maņ juprūjom byutu svareigi atrast laiku vysmoz vēļ vīnai voi divom jaunom dzīsmem, vīnkuorši sev, bet, ka patiks vēļ kaidam, tys byus vīnkuorši izcili!

Paļdis vysim klauseituojim, kas mani atbolsta un izsoka sovus sprīdumus par dzīsmem. Laimeigu i lobys muzykys pylnu itū godu!