Ka gribi, lai izdareits byutu labi – dor pats!
Jaungoda svineibys proskriejušys i ceru, ka LaKuGys klusiešona ari beigusēs. Deļ tam, kab ruodeitu pozitivu pīvadumu, saraksteju puors ryndys, tai saceit – goda suokumam. Vīnā nu interneta portalim atrodu vaicuojumu: „Kū jiusim nūzeimej Latvejis naatkareibys atjaunuošonys 20.godadīna, kuru atzeimēsim itūgod?”
Izreiz gribieju pīraksteit, ka latgaļu volūdai nikas nav mainiejīs vēļ nu Padūmu godim – atbolsts nu vaļsts jūprūjom ir nulle. Cik latgalim itī 20 godi bejuši vierteigi? Cik daudz asom panuokuši, kab dzeivuotu vaļstī par kuru byutu prīca visim tuo laika Atmūdys dalinīkim?
Latveja ir vīneiguo “muna vaļsts”, koč ari breižim prīka nu tuo moz… Tai jau ir – daudzi Atmūdys laiku ideali ir myruši, bet asom tak pa itim godim koč kū ari īsavuicejuši! As pa eistam iz tū līknu nūceju (cereibu), koč kūpumā sabīdreiba niu breižim izaver tikpat degradāta kai leidz Atmūdys suokumam, deļ tam ka “nauda, vara i personeiguo lobuma giušona” otkol ir spieceiguoka gondreiž vysūs leimiņūs par “gaišu ideji, gūdeigumu i sabīdreibys interesem”.
Godu skaits pats par sevi nadūd pamatu vaļstiskuos izaugsmis vierteibai. Nav svareigi, cik godu “aiz mugurys” – svareiguok ir piec īspiejis dreižuokā laikā saprast pīlaistūs klaidu īdeigļus i izdareit pareizūs lobuojumus. Mes tū varam izdareit, tik vēļ vys vairums guodojam, ka atbiļdeibu myusu vītā uzajims “kaids cyts” 🙁 Tai ir vīgluok – nūveļt vaini iz tim “citim”.
Itūs 20 godu “rezuļtats” paruoda, ka vēļ naesim gotovi “poši byut kungi sovā vaļstī”. Ka na sovaiduok, tod varbyut itaida “šoka terapeja” liks beidzūt atsajēgt myusim visim (kas kūpā ari esim eistynuo Latvejis vaļsts). Asu par lobuokim nuokamajim 20 nakai bejuši da itam!
Aicynoju itymā godā pyrma vaļstiskūs svātku jubilejis svineibu beidzūt sareikuot ari vārā jemamu atguodynuojumu par 1917.goda latgaļu kongresa nūzeimi myusu vaļsts liktinī, kai ari par tūlaik pījimtajim, bet pakuopeniski damierstajim i beidzamajūs 20 godūs ignorātajim kongresa lāmumim.
Dareit gotovūs aicynoju raksteit iz e-postu: kuku1917@inbox.lv