Informaceja nu LgSC Riezeknis biroja
Prīca ziņuot, ka pa vydu vysim pavasara prīkim, asom ari centeigi struodovuš! Apreļa suokumā sastuodeitais dorba plans – izpiļdeits! Asom sareikavuš tematiskūs vokorus, dasadaliejuš vairuokūs pasuokumūs. I pats golvonais- jau irā gotovs i maja aktivitašu saroksts! Asit meili gaideiti!
Speideigi īpierkumu maiseni, kruosainys motu rūtys, klaudzīši kūrpeišu papīdeiši pasaruoda, paspeist, pasamainuos- a vysam puori Atbreivuošonys alejis mašynu ryukšona. Riezeknis pylsātā i ļaužu pruotūs -pavasars.
LgCS Riezeknis biroja aktīvisti- ari pavasareigi. Anna aizvin bīžuok teik maneita brunčūs i saulisokulerūs, Oskars tuods kuo ļusteiguoks i Juo: „ak, muni nervi” mainejs intonaceju. Dagneja skraida apleik i runojās ar vysim veļ vaira kuo parosti. A parkū lai nasaprīcuotu? Saule, putni, zaļa zuoleite, pylns gaiss vysuodu smuordu i jaunu īspieju!
LgSC Rēzeknes biroja apreļa suokumā sastuodeitais dorbu plans ir izpiļdeits. Prīca pošim i cytim!
Asam dasadalejuš Riezeknis Augstškolys informacejis dīnys reikuošonā.
Myusu aktīvists Oskars ir pabejs vairuokūs pasuokumūs i seminarūs. Nu 12. da17. apreļam Jis vuiciejuos par jaunatnis dorba kvalitātis ceļšonu. Seminarā tika sprīsts – kai lobuok struoduot Jaunatnis dorbu, īsaisteit jaunīšus, lai jim byutu kur pavadēt sovu breivū laiku.
24. aprelī Oskars apmeklieja skotuvis runys konkursu „Vuolyudzāni” i latgalīšu volūdys i kulturviesturis olimpiadi vydsškolānim. Par pasuokumu Oskars soka tuo: „Vyss suokās ar Juo Ekselencis veiskupa Juoņa Buļa uzrunu i Dīva žielesteibu. Pīsadalē vysu vacuma grupu dalinīki – 1.-4.kl., 5-9.kl.,10.-12.kl. kai ari Olimpiadis komandys. Itī Vuolyudzāni saguo jubilejis zeimē, jo jau itys nūzeimeigīs pasuokums nūtyka 10 godu piec kuortys. Īzaroduse beja ari A.Rugāte, kurei sovā imidžā beja īvīsuse vīnu rozīni, kas acaspūguļuo, kai varen brangi okulari. Vyss atbylda fasonam i nikaidys pompozys svineibys nasekuo. Paļdis dalinīkim i vārtātuojim!”
Asom īprīcynuojuš RA studentus ar īspieju dasadaleit tematiskajā vokorā par naformalojam izgleiteibys metodem storpkulturu attīceibuos. Anna myusim pastuostieja par sovu pīredzi i vuiceibom Daugavpils Universitatī, par starpkulturu attīceibu byuteibu, poši papruoviejom inceresnys īsapazeišonys metodis.
Apreļa baiguos Dagneja aicynova iz tematiskū vokoru par vylnys veļšonu. Interesentu beja daudzi, draudzeigu sarunu pavadejumā tika valti vysuodi leluoki i mozuoki kruosaini breinumeni: pučeitis, sirsnenis, kruosainys bumbenis. Dalinīki tuo aizaruova, ka nagrybie pat īt iz sātu.
Vysleluokuo prīca par tū, ka reikojūt ituos aktivitatis, asam atroduši jaunus draugus i dūmubīdrus.
Asom sastuodejuš aktivitašu planu i majam:
• 12.majā 18.00 Oskars tematiskajā vokorā stuosteis, gon par Jaunatnis politiku, Eiropys Breivpruoteigū dorbu – i cytom īspiejom, kai jaunīšim izmontuot jim daškiertuos īspiejis, kai realizēt sovys idejis i pavadēt breivū laiku.
• 18.majā 20.00 kopejneicā Olmāra (Reigys īla1)- diskuseju ustoba (vaira informacejis piečuok).
• Piec dalinīku lyuguma 19.majā 18.00 Anna turpynuos vadiet tematiskūs vokorus par storpkulturu attīceibom.
• 25.majā 17.00, tuopat piec dalinīku lyuguma, byus veļ vins vylnys veļšonys vokors. Lyugums īsarast ar sovim materialim!
Asit vysi meili gaideiti Rēzeknī, LgSC Rēzeknis birojā Atbreivuošonys alejā 115-313, pirmdinēs, ūtartdinēs, trešdinēs nu 16.00 da 19.00.
Aktivu i radūšu pavasari jyusim vielej LgSC Riezeknis biroja koordinatori: Anna Briška, Dagnija Bramane i Oskars Orlovs!
Bīdreibys 2008.- 2011. goda darbeibys programu atbolsta Islande, Lihtenšteina i Norvegeja EEZ finanšu instrumenta i Norvegejis finanšu instrumenta ītvorūs, i Latvejis vaļsts ar Sabīdreibys integracejis fonda storpnīceibu.
Vaira informacejis:
E-posts: lgsc-rezekne@inbox.lv
LgSC dīnroksts skreine.wordpress.com
LgSC sātyslopa www.lakuga.lv/lg/lgsc
LgSC tvitera konts twitter.com/LgSC
Adrese: Atbreivuošonys aleja 115-313.kab., Rēzekne, LV-4600