dūmu pylni pogolmi/septembris
Vysod, kod iz mirkli apstōjūs padūmōt,
Vysod, kod saprūtu, ka īdūts ir daudz,
Man palīk nadaudz skumji.
Jautōsi – kōpēc gon?
Atbildiešu – jō nalīkas, ka man tū vysu byutu jōpatur sev.
Na jau tōpēc, ka nagribātu atdūt,
Tōpēc, ka nazynu, kai atdūt.
Bet es mekleju.
Kai zynoms – kas meklej, tys ari atrūn.
Nav nivīna, kas nūslauceitu svīdrus nu smadzeņu krūkis. Tai es ceļūs reitūs i dūdūs pi mīra vokorūs. Vīnlaiceigi ar šū dūmu. Šūraiz tei ir vīna vīneiga dūma munūs dūmu pogolmūs. Smoga i parazitejūša. Bet, ja tōs nabyutu, naz ko pītryuktu. Pītryuktu dzeivei garšis.
Šūbreid muna dzeive garšoj pēc nazynamō, satraucūšō i izaicynūšō. Taida sajiuta, ka kōpju kolnā, kas nūsāts aizdūmeigim pagrīzīnim. Orientēšonōs sports nav muna styprō puse. Bet azarta uzturēšona gon. Mani pavoda Prōts i Naprōts, mani pavoda Sirdsapziņa. Mes četratā asam vīna komanda.
“Myusim vajadzātu turētīs kūpā!”
“Ei, nagaideisim reita, īsim tōļōk jau naktī!”
Taida ir Prōta i Naprōta napōrtraukta vīdūkļu i ideju apmaiņa. Bet Sirdsapziņa parosti klusēj. Ir cīši griuts izdabōt vōrdu nu jōs. Tōpēc ari mes tik bīži aizmierstam par sovu sirdsapziņu. Deļ tō, ka napīteik pacīteibis, pošim pret sevi.
I tod var pīnōkt breids, kod asam jū pazaudējuši. Kliustam cītsirdeigi. Bet vōrds „pazaudējuši” man napateik, tis skan kai sprīdums – pazaudējuši iz naatgrīšonūs. Dreižōk mes mādzam īmydzinōt Sirdsapziņu. Ar vīnaldzeibis šiupuļdzīsmu. Jei aizver sovys acis. Bet dziļi, dziļi sevī vēl arvīn ir korsta. Gaida iz pamūšonūs.
Šūbreid Prōts i Naprōts šiupojās iz munys nūmūceitōs smadzeņu krūkis. I tei sveist. Man pīre kliust smoga, golva līcās zamōk i zamōk. Es jau radzu sovu atslāgis kaulu, i elpa sabīzej lāna. Labi, ka ir plauksta, kurā atbalsteit golvu, labi, ka ir plaksteņi, ar kurim pōrklōt nūgurušōs acis.
Bum!
Jī sasakōva. Prōts i Naprōts. Es nazynu, kurš nūkryta nu šiupelem. Par tū, ka man acis ir cīt. Bet palīk vīglōk. Vismoz iz mirkli mīrs manī pošā. Leidz otkol visi treis muni komandis bīdri otkol sareikōs kōrtejū diskusiju. Es gribātu tod nabiut sātā. Lai izlemj bez manis. Bet tys byutu atbildeibis tryukums. I patīseibā mani interesej, kū jī runoj sovā storpā. Tōpēc es atveru acis, paceļu golvu i ar napacīteibu gaidu. Kas byus. Kas byus tōļōk.