dūmu pylni pogolmi/oktobris
Saslyma Naprōts. Piekšņi. Kōsieja vysu pirmū rudins nedeļu. Tōpēc man sōpieja golva. Es juku Naprōtā. Sajyuta taida, kai kaids ar zōģi grybātu man apgrīzt motus. Naizdevīs pīmārs, bet lobōku iz dūtū breidi navaru izdūmōt. Ja pastōvātu taida frizātova, iz turīni ītu tikai eisti ekstremisti.
Jā, dzeive bīži ar myusim izspielej baiļu faktorus. Ir jōīsakļaun nūteiktā laikā, ir jōizkļyust ōrā nu labirinta, jōsasadorboj komandā ar citim, kuri narati vīn „izbesej”. Lai gon kotrs slymoj ar sindromu „EZL” – es zynu lobōk. Jā, jā, i tīši ar šū syndromu saslyma Naprōts. Problema taida, ka inkubacijis periods ir dīzgon ilgs. Varbyut pat myužeigs. Rakstureigī simptomi – īdūmeiba, napacīteiba, pōrgudreiba.
Bīži vīn „EZL” var sajaukt ar „Vysurgōjieja sindromu”. Atšķireibys? „Vysurgōjiejs” pīļaun kļyudis, „Lobōkzynōtōjs” kļyudis izloboj. Jā, ir veļ kaida atšķireiba. „Vysurgōjiejs” pīļaun sovys kļyudis, „Lobōkzynōtōjs” loboj cytu kļyudis. Tai, eisumā iz psihologiskū sindromu medicinis.
Bet kai izōrstēt Naprōtu? Jōjautoj Prōtam. Kas zyna, var jau byut ka lobōk ir atstōt vysu kai ir. Slimeibys gultā. Lai natraucej sakareigai dūmōšonai i reiceibai. Kū saceis Sirdsapziņa? Drūši vīn klusēs. Tai vysmoz liksīs. Bet patīseibā caur klusuma plāksteri jei čukstēs: Kas par zōleitem jōjam, kaidis tableteitis, cik bīži i cik lelōs devōs.
Bet ja Aptykā inventerizaceja?
Taids ir šis apburtais lūks. Rysinōjumu meklējumi.
Varbyut pītiks ja es iz mirkli apstōšūs. Navis lai padūmōtu, bet gon lai nadaudz atslōbtu. Pītiks staigōt ar taisnu muguru, izalikt par vysspieceigu, vysvarūšu, imūnu, par „vysu-zinūšū” Pītiks žālōtīs par divdesmit četrom stundem dīnā, kuris nikod naklyus par divdesmit pīcom voi divdesmit sešom. Voi divdesmit septeņom, voi… tai varātu ilgi, ilgi turpynōt. Kod es vīnu reizi izasacieju par šū astronomiskū faktu, kurš mani naapmīrynoj, man atbildieja:”Bet voi tod kaut kas maineitūs? Nūgulātu tōs divis, treis stundis.”
Jā, jam beja taisneiba. Tamā briedī manī kaut kas sakustējōs. Kai pacaldams rūku, kai bolsōdams „par”. Tei beja Sirdsapziņa.
Naprōts atveseļōjōs. Par tū, ka Prōts jū pīspīde. „EZL” sindroms iz breidi ir izgaiss. Tikai manī palics. Pa kaidai drupačai. I grauž, napateikami kutinoj. Mani aplypynōja Naprōts.
Kai es jam atsarībšu?