dūmu pylni pogolmi/novembris

Gryuts ir peldēt pret straumi. Lai gon i pa straumi peldēt gryuts. Visi gryustās. Kotrs ar sovom ambicijom. I es ar sovom.
Pi atvārta lūga siežu, rokstu. Dūmoju. Pi manis te taids klasisks rudins pogolms. I pa atvārū lūgu lānom izkōpj munys dūmis. Ar mozlīt skumju skatīni es jōs pavodu. Kai jōs pazyud. Kur kura. Cyta kūkā izlīn, cyta aizlidoj, cyta apsamat iz palikšonu pavisam tyvai pi lūga. Jei nūsaklausa munys nōkušōs dūmys.
Pabōžu golvu ōrā. Izkreit nu auss vēļ vīna dūma. Pag, pag! Tu nabēdz vēļ! Tu vēļ nabeji izdūmōta!
Velteigi saukts. Kas izkrits, tys izkrits. Pasaule pylna pībōrsteita da golam naizdūmōtu dūmu. Kaids jōs uzlosa. Kaids, kas ir spējeigs. Pōrtaisa, palaiž sauleitī otkon. Ak tōpēc tik gryuts viertīs saulē!
Pīnōkuse nakts. Es nataisu lūgu cīt. Man vajag gaisu. Ui, kai vajag!
„Gaiss, tu kur?”
Es lānom jukstu. Deļ tō, ka sarunojūs ar nadzeivom lītom. Es jōs personificeju. Bet jōs najam ļaunā.
Ar gaisu mes runōjom vysu nakti. Kas par personeibu! Vīgla i bez aizsprīdumim!
Es izstōstieju vysu. Jys vysu nūklausiejōs. Beigōs tik’ pascieja:
„Nu nav jau tik trokai, nav jau!”
Es mēģinōju īticēt. Mēģinōjums izagōze.
Šudiņ otkol tys pots laiks, tys pots lūgs. Tikai dūmis cytis. I lūgs ir cīt. Dūmoju es ilgi. Man palīk korsts. Ustobā syltumneicis efekts. Taids kai nalels tvaiks sabīzej. Nu sōkuma pi grīstim, tod laižās iz leju. Es arvīn dūmoju. Tai kai elpōt gryuts. Sasašyupoj grīstu lampa. Pi durovom kluvej.
Pīsaceļu. Kai ezeits pa myglu es taustūs leidz durovom. Viertīs pa acteņu nav jāgis. Pat ja ari tī byutu kaida navālama persona, es atvārtu durovys. Par tū, ka es asu vīsmīleiga. Bet vēļ vairōk es asu ziņkōreiga. Īpaši kas skar munus īnaidnīkus. I par tū es ari īsakuļu vysaidos napatikšonōs. Ar kurom tūmār tīku golā. Tys ir taids prīceņš munom viersnīrem – pastyrpynōta adrenalina saražōšona.
Nūspīžu iz leju durovu rūkturi. Klik!
Varbyut navajadzēja? Par vālu.
Tagad vajadzātu sekot nagaideitajam. Pīmāram, ka man tikai pasalika, ka kaids klauvej i tī nivīna paeistam nav.
Bet tī beja kaids.

Turpynōjums sekos…