dūmu pylni pogolmi/juņs

Īdūmōta paradīze iz breidi kutynoj acis i mani pōrjam korstuma vilnis. Es satīku Tevi storp divim. Storp paisuma i bāguma. Nabēdz! Bet ari natyvojīs!
„Voi tys moz ir īspējams?” Tu jautoj, „atsarast tai kai pa vydu. Tai kai kompromisā.”
„Tu zini… Es nazynu.” Vēļ vīnkōršōk atbildēt es naspēju.
Tai mes viļņojam, bet nasaskoramīs. Tai mes bāgam, bet naaizbāgam. Tai mes tyvojamīs, bet nasatīkamīs. Saule nūsaverās nu augšys. Naktī jū nūmainēt atīt mēness. Bet ja leist, tod palīk vīn apziņa. Tai mes nauzticamīs debess speidekļim, partū ka jī pīviļ. Īdūmōti tylti sorp myusim. Sabryuk, tikleidz kaida dūma grib tikt pōri. Telepatija pīviļ.
Tierpst sirds, partū ka slūdze lela. Tik tyvu i reizī tik tōli redzēt vīnam ūtru. Napaspīst rūku. I nav glōbšonōs lūku. Tikai masīvi, naspūdri lūgi. Piļni atmiņom. Mes raudom, lai nūmozgōtu, bet naspējam pīraudōt tik daudz. Myusim sejis klōtys sōrtom osoru bryucem. Veramīs vīns ūtrā kai spūgulī.
Nōk otkol korstuma vilnis. Kai vulkana lava Islandī. Man nav žāl, ka Tu sadegsi. Partū ka pyrms tam sadegšu es. Ar līsmu. Mīlesteibā.
Skrīn iudins straumem. Tyukstūšym īdūmōtu papeira laiveņu peld. Tik nivīna nav paraksteita. Tyukstūšym atsazeišonu bez vōrdim. Īspryust lūgu bīzajūs, naspūdrajūs stiklūs. Naspēj Tu paglōbt, naspēju es. Smeļam plaukstōs, iztak storp pierkstim. Palīk vīn pōrs smilšu graudeņu.
„Saskaitiet vari?” Tu jautoj.
„Atmiņis naskaita. Tōs krōj.” Tai skaņ muna atbilde. Bet man pošai jei napateik. It kai atmiņis byutu kaut kaida patieriņa līta. Kai nauda.
Es nūvieršu acis. Radzu sovu ānu. Radzu Tovu ānu. Vīnu sūli tikai. I miusu ānys sasatyktu. Tikai vīnu sūli… Es aizspīžu acis cīt. Grybu nūticēt, ka Tu spersi šū sūli.

Tu tik daudz vēļ jautōt varātu, es vēļ vairōk atbildēt, bet mes klusejom. Naz’kōpēc. I veramīs vins iz ūtru. Tod tolumā. Kur ni gola, ni molys. Tod ari dziļumā, zam myusu pādom. Kur pērles i dzintari sameiti. Plokoni kai pūgys Tod veramīs iz sōnim. Pōrbaudam, voi draugi vēļ tepat, voi tik ari jī napīviļ myus. Visbeidzūt veramīs iz augšu. Kur viss kreit lejup, bet augšup vīn putni ceļās. Tī, augšā, tī ir labi. Tur ir paradīze. Vairs naīdūmōta. Eista.
Es varu Tev atbildēt iz vysim Tovim jautojumim. Tikai ar vīnu atbildi:
„Dažreiz stōvūt atstotus var daudz vairōk īdūt, nakai asūt kūpā.”