Beja i nabeja

Nu nabeja tai,
Vīn nasaprotu,
Ka ūtraižōk apsagrīzsīs vyss…
Ka rondonō dzeive dreiži beigsīs,
Ka vōjprōts pagaiss
I pynākly kriss.

Nu nabeja tai,
Vīn naticieju,
Ka svešī saldati prūjom bēgs…
Ka Atmūdys karūgi vysur pleivōs,
Ka poši niu lemsim
Par Latveju mes.

Nu nabeja tai,
Vīn nūdūmōju,
Ka niule dzeive sovaižōk īs,
Ka smaidūt vīns ūtram rūku dūsim,
Ka laimeite poša
Pa prīšku niu skrīs.

Nu nabeja tai,
Vīn nazynōju,
Ka pravīši nūdevieji byus…
Ka naudys dieļ kai suņi jī grīzsīs,
Ka kauneibu aizmierss,
Lai lobumu ģiut.

Nu nabeja tai,
Vīn aizamiersa,
Ka latvīšim vīnam ūtru lamts kūst…
Ka sābris – lobōkīs kimūss iz zūba,
Ka lobōk ir pajimt,
Na ūtram kū dūt.

Nu nabeja tai,
Vīn cytym zynōt,
Ka navāga cīši ar muti braukt…
Ka jōpasaverās iz sevi nu molys,
Ka beja tys vyss,
I vairs napōrsaukt.