Atsauksme par atsauksmi
Vakar LgSC čyvynuošonys (twittera) kontā uzguoju saiti iz intesantu rokstu – atsauksmi par Nacionalā Reigys teatrī uzvastū lugu “Latgola.lv”. Tymā ir atzineigi vuordi par teatri i kuortejais raudzejums izskaidruot latgalīša mentalitati.
Pošu rokstu varit skaiteit ite: www.iinuu.lv
Bet LaKuGā atsaļaunu puorpublicēt sovu komentaru ar papyldynuojumim ituo vysa saisteibā:
Paļdis par pozitivu viertejumu latgaliskai izruodei!
Rokstā eipaši loba vīta: “dziesmu gars bija pilns latgalieša lepnuma, patriotisma, tas nebija atdalāms vai pretnostatījums čiuliskajai Latvijas daļai…”
Taišni tys ir juodora ari iz prīšku – juovuica reidzinīkus, ka t.s. Latgolys latvīši ir taidi poši pylnvierteigi latvīši, a na “nūvirze nu normys”.
Pi autores apraksteitajom latgalīša pozitivajom pazeimem ari ir lela daļa taisneibys, bet tymā pošā laikā kotrai nu tom varu atrast vysmoz vīnu latgalīti piļneigu pretstotu apraksteitajam. Jebkura raudziešona klasificēt vasalu tautys dali salīknūt jūs 12 horoskopūs voi saryndojūt pa 6 rangim (āduoji i dareituoji, dzāruoji i ticeigī, muzykanti i uzjiemieji) ir subjektivs.
Kotrs cylvāks ir individualitate – jū veidoj geni (kurus ar pierstu nasaspīssi), vide (kurei dažaiduos saimēs, pogostūs i regionūs var gona styprai atsaškirt) i tod vēļ personeibys kimeja (mierktīceigums voi slynkums, individualitate voi komandys gors itt.)
Cytaiž ari dzeivuodams Latgolā navari byut drūšs, voi esi eistyns latgalīts, ja gadejumā tev ir atbiļsteiba vīnai nu itaidom, preteji IINUU rokstā apraksteitajom, pazeimem:
- esi īgivs augstuokū izgleiteibu i apdūmoj, kū sok – na tikai sper vysu, kū dūmoj;
- puiss byudams pats vari gona labi sagotovuot vakarinis (a varbyut i lobuok par meiļuotū draudzini) pī tam nagatavej “spani”, bet tai, lai pītyktu divejim i nabyutu juosvīžn uorā, deļ tam ka cyukys klāvā vairs nateik turātys;
- meitine, kas ļaun sevi palutynuot ari lauluotajam draugam i na tikai poša skrīn vysam pa prīšku pi visim dorbim;
- napeipej i dzeršonu atmets deļ tam ka nūsadorboj ar jogu;
- skaidrys, ka pateik “eistys” lītys, bet iz kopa var tūmār nūnest ari skaistu koč i muoksleigu puči – tūmār ilguoku laiku kops izavērs apkūpts, it seviški deļ tam, ka na bīžai iz tīm aj – dzeivam asūt tūmār vairuok dzelu, kai tik pi myruša cylvāka kopa caur dīnu staiguot;
- esi gotovs paleidzēt, bet tūmār esi taupeigs, deļ tam ka tev nu mozuos olgys ir juouztur sevi i saimi;
- paslynks i deļ tam svātdiņuos nu reitim guļ da pušdiņu, i vyspuor – iz bazneicu naaj gondreiž pavysam – apnykuse ir prīstera bļuzniešona par vīnu i tū pošu, kam mozs sakars ar myusu dīnom;
- dvēselē atkluots par daudz – ļausi īkuopt i īspļaut kotram svešinīkam i na tikai “pošam tyvuokajam”;
- humora izjiuta ir, bet pošam Dīvs tūmār nav devs talantu jūkus taiseit i byut iz reiz kompanejis dvēselei kotrā saīšonā…
Cyts latgalīšus tradicionali rakturuos kai dzāruojus, prostus i tik ar zyrgim braukojūšus, sātā bez elektreibys, datora i bez škārsteikla jau nu pavysam točna. Tūs jau poši byusit atsaklausejuši i puorsaskaitejuši.
Voi kaids var raksturuot kurzemnīkus? Cik pīmiņu nu školys programys – dzeivoj vīnsātuos, puorsvorā ir luteri, asūt cīš lapni i leli patrioti, tur sātā kolpus… vairuok nikuo nazynu – jī puoruok tuoļ nu Preiļu dzeivoj.
i tod, voi kaids var raudzēt raksturuot reidzinīkus?
Kotram nu viertejumim ir daļa taisneibys, tikai breižim jūceigai skaiteit tekstus, kas rauga mani – Latgolys latvīti (latgalīti) raksturuot i “izskaidruot” nu molys. Breižim vari sazajust kai taids pietejamais augs, putyns voi meža zviers – kaidys sugys puorstuovs. Reigā kaidam pasokūt, ka esi latgalīts – Tu iz reiz itymā vuordā īlīc vasalu vazumu ar informacji: prosts, atkluots i deveigs, muoc dzīduot, ticeigs katuoļs, uzjiemiegs, ītīpeigs itml. Kotram jau sovaiduoks tys latgalīša stereotips…
Asu cylvāks. Latvīts. Ar sovim plusim i sovom vuojeibom, ar sovim dzeivis uzskotim. Ar cytaidu pīredzi, bet deļ kam tū vysu skaidruot – pasok tik vīnu vuordu: “latgalīts” i tovam sarunu bīdram jau byus gotova biļde, kas Tu par putynu.
Tikkū “uotrī” nūskrē iz pogosta pusi – tai nūteik gona bīžai. Bēris kotru nedeli pi myusu nūteik, a jaundzymušais ir lela prīca vysam pogostam… Kūpumā: aizbrauc i izmierst latvīšu tautys pamats, kas tūmār nav tik vīglai klasificejams kai lūpu bors – kotrs cylvāks ir vīns vierteigs atsevišks pasauļs!
P.S. Visim latvīšim prīceigus vaļsts proklamiešonys godadīnys svātkus!