Vylku pavasars Latgolā

Grupa Borowa Mc, sakstejūt gadalaiku meitu, klauseituojim pīduovoj caturtū i piedeigū singlu “Pavasars” nu albuma “Ui, lobs!”. Sataiseita ari dzīsmis tiemejamuo verseja naparostā – multiplikacejis filmys – veidā, kurū nu 23. marta ruodeis ari kanals MTV Baltic.

Navā tai, ka itymā pavasari byutu nūvāruots vylku populacejis pīaugums Latgolā. Ituos ir sovaižuoku vylku cytaidys aktivitatis – latgalīšu modernuos muzykys grupa Borowa Mc aicynuojus grupys “Dzelzs Vilks” dalinīku Juri Kaukuli, kura spieceigais bolss niu dzieržams dzīsmē “Pavasars”.

Borowa Mc ir prīceiga ari par sadarbeibu ar jaunū i daudzisūleigū animacejis muokslenīku, Latvejis Muokslys akademejis studentu Juoni Opulu. Animators kusteiguos treis dimenseju biļdēs ītierpa Aigara Runča radeitū scenareju, īsadvesmojūt nu pošys dzīsmis. 4 minutis garuo multfilma stuosta par ciļvieceigom attīceibom i sasasauc ar puormeitim dobā, tū paruodūt godalaiku meitā.

Pīduovojom dzīsmis tiemejamū verseji ari LaKuGys skaiteituojim!