Vosoriskums

Sīna laiks ir interesants ar tū, ka pļuovieji tod cīši daudz dūmoj, kaidi byus dabasi tyvuokajuos dīnuos. Andryvs Jūrdžs beja pazeistams na tikai ar sovom rūciski saraksteitajom gruomotom, bet nu tyvom i tuoļom vītom vēļ vaira cylvāku brauce pi juo ar vaicuojumim, kod sēt maizi, voi kurynuot guņkurus uobeļu suodūs, kod izīt ar izkaptem pļovā i ar sierpim dryvā.

Tu varieji daudz i pruoteigi struoduot, bet dadzynūša saule voi leits nedeļu garumā otkon i otkon tev sacēja: navar nūpierkt lobu laiku.

Tradicionals suokums puordūmom!
Tod pasaruodeja barometri, tod laika prognozis ziņu beiguos, tod īlyktuos internetā tabulys mienesi iz prīšku.

Nazynu, kas Jūrdžam saītu, bo dzeivuotu jis tān.
Kod es beju škoļnīks, vysi gribēja atvalinuojumus junī, majā beja vēļ par soltu, bet nu juļa vyds jau skaitēja, ka vosora ir beigusēs.

Tān atvaļnīki orientejās iz augustu, bet cytu reiz septembris ir pots korstuokais mieness godā.

I kū dūd itymā vysā Andryva Jūrdža myužeigī kalinderi, kū dūd daže pyrms 20 godim kaida cylvāka praktizietuos laika pareģuošonys formulys?

Nastruoduoja i nastruodoj tī laika pareģuojumi, kuri ir saisteiti ar datumim.

Es vysod ar skepsi atsanešu pret taidom laika pareģuošonys formulom, ka nu tuo, kaids ir janvars, byus zynoms, kaids byus juļs, ka nu tuo, kaids laiks ir Svacainē voi iz Sorokim var pasceit, kaids laiks byus kaiduos konkretuos vosorys dīnuos itt.

Cik daudz cylvāku tān zyna, kurymūs datumūs ir Jezupa, Ontona, Eliaša, Alfona, Buorbolys dīnys? I cik daudz ir tūs, kuri zyna, ka vēļ pyrms symts godim gon Baltinovā, gon Užavā laiku skaitēja cytaižuok, na tai kai niule?

Ka jaunlatvīšu strēčē tauta dzeivuoja i teicieji runuoja par datumim, kuri atsaškir nu niulejim iz puors nedeļom.

Datumūs sasītuos laika pareģuošonys formulys napareģoj laiku, tuom ir vīneigi simboliska funkceja.Tik pat simboliska kai myusu dzimšonys dīnai, kuru mes varim svinēt kotru godu, bet kotru godu eistineibā svinēsim cytā laikā, partū ka goda garums ari nav vīnaids.

Bet simbolā, pateik tys myusim voi nā, vysod ir ari didaktika.
–Bet bez didaktikys nav tradicejis, – tai atkuortuoja Ontons Kūkuojs.

Tam, ka byus leits, kod arleigys zemli lidoj gar zemi, ka da Zīmyssvātkim byus daudz snīga, partū ka ūzūlūs ir daudz zeiļu i lozduos rīkstu, ka zīmys īsuokumā byus moz snīga, bo peles sovus midzeņus taisa dzili – tam es tycu nazkai.

Paturūt pruotā varbyuteibys teoreju i laika distanci.
Es nanūlīku paceli kurtku, cikom navā puorzīdiejušys īvys.
Es naskraidu pa pļovu, maklādams kotrā zīdlapeņā apslāptu nūzeimi.