Vēļreiz ap Jezupa dīnys koņcertu Reigā

Kab aplīcynuotu latgaliskys „Latgolys radejis“ napīcīšameibu i laseitu leidziekļus deļ radejis atjaunynuošonys, catūrtdiņ, marta 19 dīnā, 19.00 stuņdēs Reigā, Kongresu nomā, Kr. Vaļdemara ūļneicā 5, nūtyks latgaliskys i ļusteigs labdareibys koņcerts, kymā pīsadaleis daudzeji latgalīšu muzykaņti i ansambli. Īīšona koņcertā – par pazīdim.

Koņcertā izastuos: „Bez PVN”, „Crust”, „Dabasu durovys”, „Dzyga”, „Green Novice”, „Latgolys damu pops”, „Likteneigais pagrīzīņs iz Vainovu”, „Maskačkys spieļmani”, Biruta Ūzuleņa, „Patrioti.lg”, „Piec leita”, „Restauratori”, „Syrūbi”. Vysi muzykaņti spieļuos par breivu.
Labdareibys koņcertu organizej bīdreiba „LR”. Papyldoma inpormaceja ap itū ļaudiskū organizaceji atrūnama puorstaipteiklā: lr.lv/

Koņcertā salaseitī pazīdi tyks montuoti latgaliskys „Latgolys radejis“ atjaunynuošanai. Nu janvara, kod „Latgolys radeja“ ar Komerclykuma puorkuopumim puormeja sovinīku, „Latgolys radejis“ prekveņcejuos retranslej cytys radejis staņcejis: suokuos – Daugpiļs „Alisu+“, tān – Krīvejis „Love Radio“.

SIA „MG Latgolas Bolss“ („Latgolys radeja“) mozuma dalinīki itūšaļt irā apstreidejuši puordūšonys lykumeibu, i, ka darejuma registraceju administrativai atceļs, tūlaik tyvuokajā laikā jīm rassīs vareiba izlītuot pyrmpierkšonys tīseibys i „Latgolys radeju“ atjaunynuot. Sovaižuok, ka daīs sūdeitīs pa byuteibai, tūreiz NRTP irā gotova izavērt vareibu daškiert bīdreibai „LR“ laiceigu atļuovi i prekveņcejis apraideišonys nūdrūšynuošonai iz sūdeišonuos laika.

Bīdreiba „LR“ dagrīž viereibys, ka pošreizejajūs apstuokļūs, kod Latvejis Republikys opicialī īstoti ignorej latgalīšu volūdys byusmi kai taidu i kod politiskai tū ītakuot navā vareibys, kam Seimys ībolsuošonys sistema ar 5% barjeru irā orientāta iz regionalūs parteju garantātu natykšonu Seimā, vīneiguo vareiba nūdrūšynuot latgalīšu volūdys sasaglobuošonu irā tautys pošorganiziešonuos „nu zamuškys“. „Latgolys radejis“ atjaunynuošona, kontrolpaketu puorjamūt ļaudiskajai organizacejai, byus pyrmais itaida parāda precedents Latvejā.

Deļtam vysi Reigys latgalīši i latgalīšu volūdys pabaļsteituoji irā aicynuoti iz marta 19 aba Jezupa dīnys latgalīšu muzykys labdareibys pasuocīni Reigā, Kongresu nomā, Kr. Vaļdemara ūļneicā 5. Koņcerta suokys 19.00 stuņdēs.

Īīšona koņcertā par pazīdim. Īsakomais pazīda apmārs – Ls 5.
Planavuots, ka piec gavieņa i Leldiņu koncertu cykla turpynovumā labdareibys pasuocīni nūtyks ari vysūs leluokajūs Latgolys mīstūs: Preiļūs, Rēznē, Ludzā, Bolvūs, Kruoslovā, Daugpilī i Krystapilī.

A. Bierzeņš, bīdreibys „LR“ volda prīšksādātuojs,
tel. 29141314
G. Rasims, bīdreibys „LR“ volda bīdris,
tel. 29492864