Šudiņ Latgolys Radejai pādejuo dorba dīna
Jamūt vārā pādejuo laika nūtikšonys ar „Latgolys radeju“ i gaidomū raideišonys puortraukšonu, bīdreiba „LR“ tur par sovu daguojumu dūt publisku izskaidrovumu par situaceju „Latgolys radejā“.
Apraidis atļuovi „Latgolys radejis“ programys raideišonai tur SIA „MG Latgolys Bolss“, kurys lelokais dalinīks irā Vaļds Labinskis ar 92 daļom. Puorejīm 7 dalinīkim pīdar 8 dalis.
Kai jau irā zynoms, mozuma dalinīks Aņss Ataols Bierzeņš dasasaceja iz pyrmpierkšonys tīseibu izmontuošonys pa janvara 8 dīnys dasarunai, kab varātu saglobuot radejis latgalisku saturu.
Lai gon Aņša Bierzeņa darbeibys rezuļtatā izadeve atjaunot agruokū dalinīku strukturu i „Latgolys radejis“ programys raideišonu, vys tik V.Labinskis nasasadorbova ar bīdreibu „LR“ attīceibā iz radejis atīsmi, par kū līcinoj aizlīgums radejis eterā laist bīdreibys inpormaceji par atspaidu radejai i juo nagribiešona meklēt liešuokys radejis apsaimnīkuošonys pormys. V.Labinskis turpynova vīnpersoniskai puorvaļdeit radeju i meklēt personys, kurom varātu jū puordūt.
Bīdreibys „LR” i A.Bierzeņa darbeibys rezuļtatā irā izadevs salaseit Ls 15 000 deļ radejis daļu pierkšonys. Vys tik iz itū šaļti na tikai navā nūtykuse daļu puorregistraceja iz A.Bierzeņa vuorda, bet arī klivs zynoms, ka radejis pinansialais stuovūklis irā cīši švoks.
SIA „MG Latgolas Bolss“ tur porodus iz apmāram 90 tyukstušom latu, nu kuru 62 irā porodā Vaļžam Labinskajam, zam 10 – cytom personom, kas naudu aizdavušs, i zam 20 – par takūšajim radejis moksovumim (raideišona, elektreiba, raideituoja pastateišona, olgys, nūdūkli i c.) dažaidom personom. Juoatzeimoj, ka par leluokuos dalis itūs porodu rasšonūs atsaceigs V.Labinskis, kam jis beja SIA volda lūceklis aizjimtuos naudys nasaimisteiguos izlītuošonys laikā.
Bīdreiba nūruoda, ka Vaļža Labinskuo publiskī puormatumi Aņšam Bierzeņam par atsasaceišonu puordūt sovu SIA „MG Latgolas Bolss“ daļu piercejam, kurs gryb nūpierkt vysus 100%, navā pamatuoti ni pormalai, ni pa byuteibai. Pormalai tys irā juo personeigs monts i nivīns natur tīseibys pīpraseit jam sovu montu puordūt, lai cytam (itymā gadīnī – V.Labinskajam) nu tuo byutu lobums.
Bīdreiba „LR“ vysod irā deklarejuse, ka juos darbeibys golvonais aizdavums irā latgaliskys radejis, t.i., taidys radejis, kymā skaņ runa puorsvorā latgalīšu volūdā i gona daudzi latgalīšu muzykys, ilglaiceiga darbeiba. Itymā gadīnī V.Labinskuo atrostais investors aba pierciejs irā gotovs sūleit apraidis volūdys saglobuošonu da 2009 gods beigu, tymā pošā laikā akceņtejūt tū, ka jū iņteresej tikai bizness i ka iz prīšku radeja byus taida, ar kaidu varēs lobuok aizpeļneit. Tierga situaceja Latgolā itūšaļt irā taida, ka ar krīvu voi baļtīšu radeju var aizpeļneit vaira, partū mes varim byut gondreiž puorlīcynuoti, ka iz cyta gods radeja tyktu puorslāgta iz cytys volūdys i myusu golvonais aizdavums – latgaliskys radejis ilglaiceiga darbeiba – natyktu izpiļdeits. Stuostam par kaiba lelom iņvesticejom radejā ilguokā laikā iz prīšku nateik pasaceita cyta puse – iņvesticejis navā paradzātys raideišonys latgalīšu volūdā nūdrūšynuošonai. Tys irā vīneigais nūsacejums, kū bīdreiba „LR“ i A.Bierzeņš kai SIA „MG Latgolas Bolss“ dalinīks izstota, vysu puorejū, tymā skaitā programys pormatu, potencialais investors var meit, bet volūda itymā gadīnī irā principiala.
Pierceja praseiba pierkt SIA „MG Latgolas Bolss“ vysus 100% i atsasaceišona pierkt daža 99 dalis, 1 pamatūt mozajim dalinīkim, skaidrai paruoda, ka potencialais pierciejs gryb piļneigu kontroli puor radeju, kas izslāgtu mozūs dalinīku pretiveišonūs volūdys puormeišonai, i pastyprunoj aizdūmys, ka piercejs jau tān irā puorlīcynuots, ka jis apraidis volūdu puormeis.
Pa byuteibai taida puordūšona byutu eislaiceiga i nalela lobuma dabuošona SIA „MG Latgolas Bolss“ leluma dalinīkam V.Labinskajam, par tū samoksojūt ar radejis latgaliskuma iznycynuošonu. Nimoz narunojūt ap tū, ka A.Bierzeņam tai ari navā īdūta vareiba izlītuot sovys pyrmpierkšonys tīseibys.
Iz itū šaļti bīdreiba irā salasejuse zam 7 tyukstušu latu, zam 9 tyukstušu irā A.Bierzeņam cytu personu aizdūta naudu deļ radejis daļu pierkšonys. Bīdreiba aplīcynoj, ka vysa itei nauda tiks izlītuota tikai latgaliskys radejis ilglaiceigys darbeibys nūdrūšynuošonai, naatkareigi nu tuo, voi apraidi organizēs car SIA „MG Latgolas Bolss”, voi cytaižuok.
Bīdreiba „LR“ ari irā iņtensivai mekliejuse investorus, kas byutu gotovi investēt latgaliskā „Latgolys radejā“, bet, jamūt vārā vysus apstuokļus, tymā skaitā SIA „MG Latgolys Bolss“ lelūs porodus i pinansialū situaceju vysā Latvejā i juos reklamys tiergā, taida atrost naizadeve. Tymā pošā laikā irā potenciali investori, kas byutu gotovi īt vydā, ka radejis puordūšonys i porodu kūpsuma atsatyktu juos tierga vierteibai. Partū bīdreiba turpynoj meklēt SIA „MG Latgolas Bolss“ puorjimšonys rysynovumus.
Mozuma dalinīki irā izsacejuši gataveibu nūregulēt vysus juridiskūs vaicuojumus radejis latgaliskuma saglobuošonys garaņteju dūšonys gadīnī nu potencialūs investoru pusis, bet, dīvamžāļ, investoru, kas byutu gotovi taidys garaņtejis dūt, navā.
Taidā situacejā A.Bierzeņa nagribiešona puordūt sovu daļu nivīnam, kas nadūs garaņtejis radejis latgaliskumam iz prīšku, navar tikt kritizēta ni nu lykuma, ni nu moraļs redzīņa. SIA „MG Latgolas Bolss” daļa irā A.Bierzeņa sovums, vys tik apsazynojūt tū, ka ite runa irā na tik daudzi ap juo montu, cik ap tautys iņceresim, A.Bierzeņš irā gotovs sovu sasprīdumu pījimt piec apsasprīsšonys ar pošvaļdeibom i bīdreibys „LR“ voldu.
Bīdreiba tur nūceju, ka izadūs atrost rysynovumu, koč situaceja ar SIA „MG Latgolas Bolss” naizaver perspektiva.
Bīdreibys „LR“ volds: Aņss Bierzeņš, Agris Bitāns, Anne Rancāne, Guņts Rasims, Imants Slišans
