Sovvaļnīka dzīsmei video klips bazneicā
Vīnai nu Sovvaļnīka debejis albuma „Sūpluok” spieceiguokom dzīsmem „Vysi vieji” teik taiseits video klips, kura golvonī kadri teik filmāti Aglyunys pogosta Bēržgalis bazneicā i tuos apleicīnē. Tei ir vīna nu vacuokuom kūka bazneicom Latvejā, i itei vīta izlaseita par tū, ka tai piec video klipa taiseituoju guodim pīmeit eipaša, fascinejūša i radeigu guoduošonu veicynūša aura.
„Vysi vieji” video klipa taiseišonys pyrmuo kuorta nūsaslāguse i muzykis Ingars Gusāns komentej pīdzeivuotū: „Naizbāgama i dažaidys puordūmys raisūša beja sasatikšona ar vītejim soluonīšim, kas pīzyna, ka ir gryuši dzeivuot dyžanuos nalaimis apstuokļūs, nu jūs dzeivis pīredze i garajūs myuža godūs giutais ryudejums kai ari Dīva paleidzeiba naļaun jim bāduotīs. I tū pošu jī nūvāl ari myusim.” Soltais oktobra laiks radejs ekstremu jutūni filmeišonys grupai – puorstuoveigi daguojs pyuderēt nūsolušūs sorkonūs dagunus, deļ tuo vēļ jū vaira apbreinys i cīņys pīdar bazneicānim, kas īt iz itū naapsiļdomū kūka lyugšonu nomu. Muokslenīks i filmeišonys grupa pasasoka Aglyunys bazilykys dekanam A.Aglyunīšam par atsauceibu.
Muzykys video taiseituoji dažys minutys garaja klipā gryb paruodeit dzeivi pīredzejuša cylvāka spovedi – atsazeišonu i puordzeivuojumus. Video skateituojim tiks ruodeits ituo goda nūgolē. Sovvaļnīka daiļradis cīneituoji i tī, kas īmeiļuojuši dzīsmi „Vysi vieji” aicynuoti ari iz prīšku podturēt tū radeju staceju topūs, eipašai Latvejis Radio 2 Muzykalajā bankā kai vīnu nu goda vierteiguokom dzīsmem.
Jau itymā nedeļā Sovvaļnīks jeb Ingars Gusāns reizē ar pavadūšojim muokslenīkim brauks iz Nīderlandi, kab izpiļdeitu pyrmū albuma singlu „Pats sevī dzeivs” vydtautiskajā mozumtautu volūduos dzīdūšūs muzyķu konkursā Liet International 2009. Sovvaļnīks itymā konkursā ir vīneigais dalinīks nu Baltejis valstim.
Konkursa vokora koņcertā tiks izpiļdeita ari dzīsme „Vysi vieji”, kurys īrokstu var nūsaklauseit škārsteiklā www.draugiem.lv/Sovvalniks, kur var izzynuot ari aktualumus par muokslenīku i raksteit viestulis, sveicīņus gostu gruomotā. Vaira par vydtautiskū konkursu (angļu volūdā) www.liet.nl/en/internationaal/.
