Pyrmūdīnis reita posts. Kas ir latgalīši?
Raudzējem nūskaidruot, voi bīdreiba “Latgolys Studentu centrs” sovus projektus, kas vārsti iz latgalīšu volūdys aizsardzeibu i pamatā ir kulturys pasuokumi, kursi, seminari Latgolā i Reigā, var īsnīgt Sabīdreibys integracejis fonda projektu konkursam, kas atbolsta itaidys aktivitatis. Nūsacejums – mozuokumtauteibu bīdreibu aktivitatis.Piec aproksta navarēja saprast. Tys ir 1:1 tys, kū mes dorom – paraleluo kultura paralelajā Latvejā. I paraleluo jimšonuos ap lītom, kas ir paralelys.
Partū ka latgalīts ir latvīts tik tod, ka jis runoj i roksta latvīšu literarajā volūdā. Tai saceit, ir integreits, pataiseits par cytu. Partū ka Latvejā integraceja vystik ir navys cytaidūs īkļaušona, napagaisynojūt jūs sovpateigumu, a puortaiseišona piec vīna šablona.
Pagaidom myusu vaļstī navari byut latvīts i raksteit latgalīšu rokstu volūdā. Navari latgaliski pasaceit – es asu Latveja. Tys ir, saceit jau tu vari, mums tok ir demokrateja – breivi cylvāki breivā sabīdreibā. Tok par sovu naudu i nu maizis dorba breivajā laikā. Kod jau esi samoksuojs nūdūkļus sovai vaļstei.
Tai i saīt – vīna tauta, div kulturys. Kai kas, tai par reizis separatisms i atsadaleišona. Kai skaitamā paņteņā, kū īsavuicejuši i niu bīdynuošonai i pošīdvasmai skaita jau apmāram godu symtu – tai Kempam, tai LgSC.
Dūmuot, vysi tuo vīn gryb kai sasaškeļt i atsadaleit. I profilaksis piec ir juopataisa vīnaidi…
Beistitēs, nasprāgojit, esit kai vysi – a to atīs lelī i myusus mozūs pajims pa vīnam kai cuoļus. Latvīši ir lela tauta, kod jim nav latgalīšu. Tys ir, kod latgalīši nav latgalīši, a bess zyna kas.
Sarakste storp LgSC i SIF
Voi latgalīšu bīdreiba var īsnīgt sovus jau byuteibā izstruoduotūs projektus, kam tik vīn tryukst kai naudys, SIF projektu konkursā.
Par pīmāru, jaunīšu seminars “Atzolys” – jau nu 2004. goda vosorys kotru godu organizeits seminars jaunīšim par latgalīšu kulturu, volūdu, viesturi. Voi latgalīšu rolstu volūdys kursi Reigā, Rēzeknē, Daugovpilī i informativi seminari par ortografeju Latgolys piļsātuos, cīmūs. Jaunīšu braucīņs ar ritinim pa Latgolys mozajom školom (bez politikys, tikai ar sovejim deļ sovejūs). Voi latgalīšu karaokis diska izdūšona. Voi latgalīšu bazneickunga braucīņs iz Sibiri i latgaliskuma, tys ir, latvyskuma nesšona, atgrīzšona tīnīnis latgalīšim – dīvkolpuojumi pa sovam, informativi seminari. Kinu izdūšona par Sibira ekspedicejom, satyktūs vizualūs līceibu paruodeišona televizejā. Latgalīšu ziņu portala sataiseišona i palaisšona – na tikai kulturys zinis kai Lakugā, a vysa informaceja par vysu, tik latgaliski. Latgalīšu gruomotu izdūšona. Latgalīšu muzykys koncerti vosorā. Literarūs dorbu skaitiejumi. Pasuokumi jaunīšim – lekcejis, saīšonys, ekskursejis, saceņseibys.
Tī vysi ir jau nūtīkūši, asūši i izdūmuoti pasuokumi. Tik ar finansiejumu kai kod. Ir reizis, ka nikai. Sasamest buļbom i myltim deļ kūpeiguos kuknis, ar laipnu atbolstu atrast telpys – nūmetne gotova. Tai kai Sanūs omotu škola Birkineļūs. Tok voi tei var byut norma – vysu laiku pret kolnu. Meklejūt izeju i idejis, kai atrast izeju.
Reizem otkon ruodīs – parkū latgalīšim pošim juodora tys, kū cytim dūd vaļsts. Ka gribi sovu bārnu vuiceit latgaliski, vuici sātā i saimē – IZM īriedņu atbiļde. Vaļsts tok nalīdz sātā runuot latgaliski! I latgalīšu volūdu vuicuos sātā… Školai tī nikaida sakara. Koč sabīdreibys toleraņcei tys byutu tikai īgivums – zynuot par obejom rokstu tradicejom.
Tys ir, sabīdreibys integracejis politika myusu vaļstī naatsatīc ari iz latgalīšim i jūs kulturys kūpšonu, atbaļsteišonu. Koč itei ir myusu vīneiguo vaļsts. Sabīdreibys integraceja i atbolsts kulturys sovpateibai atsatīc tikai iz mozuokumtauteibom, kam nazkur ir sova vaļsts i Latvejā tikai diaspora.
Mani sauc …, un es pārstāvu biedrību “Latgolys Studentu centrs”.
Sakiet, lūdzu, vai aktivitātes, kas vērstas uz latgaliešu valodas saglabāšanu, popularizēšanu, attīstību iekļaujas šī projektu konkursa ietvaros un mēs varam iesniegt projektus, kas saistīti ar latgaliešu valodu?
Paldies!
Ar cieņu, ….
Labdien!
Paldies par izrādīto interesi!
Grantu shēma “Pilsoniskās sabiedrības stiprināšana un sabiedrības integrācijas veicināšana” paredzēta _mazākumtautību _biedrībām un nodibinājumiem.
Grantu shēmas mērķis ir veicināt sapratni un sadarbību starp dažādu tautību pārstāvjiem.
Ar cieņu…
Sveiki vēlreiz!
Kā var uzzināt, kura biedrība ir mazākumtautību biedrība?
Piemēram, Īpašu uzdevumu ministra sabiedrības integrācijas lietās sekretariāta mājaslapā ir atrodams šāds reģistrs, kur latgalieši ir minēta kā mazākumtautība un tos pārstāv 3 biedrības (skat. pievienoto failu).
Vai šāds saraksts ir izveidots arī SIF?
Paldies!
…
Labdien!
Atvainojos par kavēšanos!
Mazākumtautība ir citas tautības pārstāvji, kas dzīvo Latvijā, tiem ir sava valoda, kultūra un reliģija.
Latgalieši nav mazākumtautība, bet ir latviešu tautas sastāvdaļa, pamatnācija ar savu dialektu.
Ar cieņu….
Pamatuojums ideals 😀 😀 😀
Sova religeja nav vysom mozuokumtauteibom – ari latvīši ir pareizticeigī, a vuocīši luterani i leiši i poļaki katuoli.
Kultura var byut kotram sova. Tikpat labi, Preiļu nūvods var pasaceit, ka jim sova kultura.
Volūda?
Pīruodi, ka latgalīšim nav dialekts. I mes asam mozuokumtauteiba. 🙂
Laipni aicynoju šūvokor 17:00 vysus iz myusdīnu latgalīšu rokstu volūdys kursim Latvejis Nacionalajā bibliotekā. Vacajā LNB kuormā ar breineigajom čeikstūšajom durovom i greidom.
Kursus atbolsta tikai LNB, īdūdūt telpys. Lektori struodoj par veļti. Papeirs nu LgSC īkšejūs rezervu.
Partū ka mes gribim, kab vaira cylvāku muoceitu raksteit sovā volūdā. Ari Tu.
Nuokušais e-posts. 🙂
Labdien Ilze,
Atradu internetā jūsu portālu un atradu daudz saukļus latgaliski, kas man ieinteresēja un gribu Jums piedāvāt T kreklus ar šiem saukļiem, kurus Jūs varētu izvietot savā mājas lapā, gazetā un citur.
Mārtiņš
Patīseiba ir nazkur pa vydu.
Kai muna draudzine Santa pasacēja: Latgalīts ir zūbs dyrsā īryusiejušam īriedņam i sorkona lupota daguna golā nanūbrīdušai personeibai. Ni nūjimt, ni dalikt. 🙂
Tok latgalīšu rokstu volūdys kursi byus. Nu 20. apreļa da 15. juņa pyrmūdīņu vokorūs. LgSC bīdri vuicēs cytim jaunīšim, studentim, interesentim tū, kū ir īsavuicejuši poši.
Partū ka mums tuo vajag. I cerīs, ka vajag i cytim.
Kai jau rakstieju 28. oktobrī par latgalīšu biznesu bibliotekā:
Kū vaira volūdu zyni, tū vaira informacejis atsasadz. Ka labi zyni dzymtū volūdu, atsasadz vēļ vaira. Varbyut atsagrīž tovs dzeds i baba, a varbyut – tu pats.
Breivā vaļstī breivam cylvākam navar aizlīgt tuo, kas ir īraksteits Vaļsts volūdys lykumā – ka vaļsts apsajem aizsorguot, saglobuot i atteisteit latgalīšu rokstu volūdu.
Ka tuo vajag maņ i tev, taitod tuo vajag myusim. Taitod mes varim sasarunuot sovā storpā, taitod volūda ir dzeiva.
Ka tuo aizavajag i cytam, mes varim īdūt, pasadalēt ar sovu zynuošonu. Cikom volūda ir runojama i skaitama, na tikai skaitama. Cikom ir kū dūt i ir kam dūt.
Ka jau es asu vaļsts i ka jau vaļsts navar dareit tū, kuo varu dareit es, taitod vaļsts nav i es doru.
Taida tei byušona. Taidi i mes. Deļtuo i kursi.
Paļdis bibliotekai. Paļdis vysim trokajim.
