Puors atminis i drusku par Ameriku
Sanuoce dzeivī tai, ka tyku iz – Ameriku. Vēļ 1940.goda junejā myus pavuiceja, kai dzīduot: “voron plaša muna zeme dzymto”. A mes puiškini smiejam i dzīduojom pa sovam: “voron plaša munys motis taša”. Ar putom iz lyupu tyka stuosteits, cik vorona taida padūmu zeme.
Padūmoj tik: vīnpadsmit laika jūslas! Lai gon kaidas ostoņas myužeigā ladā i snīgā gar vysu Sibirijas molu. A taida Latgola tikai taids pagasteņš pi padūmu rūbežys…
Kars aizvede iz Vuoczemi, a jau 1950.goda augustā tyku Amerikā.
Kas ir Amerika? Kontinents 🙂 Pat divi – zīmeli i dīnvydi. Tur zīmeļūs – Kanada, Meksika i Amerikas Savīnuotuos Vaļstis. ASV – 50 vaļstis voi štati. Kotram sovi lykumi, sova kuorteiba i sova lykumdūšona. Savīnuotuos, bet, lai byutu tyvuok bolsuotoji, vysa teritoreja sadaleita 50 daļuos. Latvīšu volūdā daži štati nūsaukti pa sovai mūdei. Saceitu amerikānim, tys breineitūs, nikod nadzierdejis taida vuorda. Kur ir Kentuki? Taidu “kentuku” nav, ir Kentaki. Nav Masačusetsa, bet Masačusets. Tod nav….
Bet nu ej īstuosti visim latvu endzelinim, kai izrunuot svešus vuordus! Taipat nivīnam kuorteigam čiulim nasastuosteisi, cik našpetna taida Amerika. Dūmojam, ka taids amerikānis, voi tautas mutē “ameits”, ir gluži kai “krīveņš”: līleigs, kuors uz naudu un laimi. (persuit of happiness).
Saceišu, caurmāra ameits ir pavysam lāga cylvāks. Runoj par beisbolu, futbolu, sokeri, voleju, tenisu. Skrīn uz sporta spielem, iz krateikli (Rock-n-roll), klausās brīsmeigi skaļu muzyku. Plieš voi auss pušu. Bet var labi izagūreit, žveņgeleit, krateitīs. Ari nu molas – ir kū nūsavērt. 🙂 Vosorā, pa nedelis nūgalem, suocūt jau ar pīkdines nūvakari, vysi skrīn iz laukim breiveibu baudeit.
Braukoj pa Savīnuotom vaļstim (Savīnuotom reSpublikom). Brauc iz Niagaru, kolnim, Floridu voi Kaliforneju. Pi krokodilim, aligatorim, luočim…
Brauc spininguot, medeit un naz kū vēļ. Golvonais – rogi, kū pi sīnas likt, biļdes, cik lelu zivi var nukert. Muns 52 godi vacais puika (tai nu as jū jūprūjom saucu), nūkieris zivi, izjam uoki i laiž leidaku voi somu atpakaļ iudinī. Doba juosaudzej – jūceiguo Amerika!
Ībraucūt Amerikā myusim beja svariga suokuma miseja: izskaidruot, kas mēs esim. Tū dareja ir čiuli, ir latgali. Parosti kaids vaicoj: “Tev taids jūceigs akcents. Nu kurīnes esi?” Latviju nivīns navarēja pasceit: Latvonija voi Laponija beja ameiša gola sliedzīņs. Kod tev vaicoj tū pošu divdesmit reizis, tod jūku nikaidu! Gotovais duraks taids ameits, ka nazyna, kur taida Latgola, deļ tam es palyku pi tuos pošas Latvonejas.
Kod bejom ameišim īskaidruojuši, kur Laponeja ir, beja juodora divys lītys. Vysapyrms juopeļnej nauda, ar kū samoksuot par ustobu. Lai var nūpierkt dasu, maizi, aleņu. Tod beja plykums juopīveic. Sīvīšim mūdes dzela lela.
Ar tim dorbim beja tai: varieji dabuot tū mozuok samoksuotū, neteiruokū. Visi lauzēs peļneit vairuok. Daudzim atause gaisma: vajadzeiga izgleiteiba, lai tyktu iz augšu!
A kū taids rubineits, kai es, izdora? Jis īt dramas koledžā vuiceitīs, kai raksteit lugu! Vot kai. Leli beinumi beja Reigys slavineibom: kū bez volūdas taids 23 godu vacs puiss īsuoks? Pa vosorom stuoduoju duorznīceibā, pa zīmu študierieju – dramu. Tod Bostonas universitatē dabuoju magistra grādu smolkajuos muoksluos.
Apjiemu sīvu. Aizbrauču nu Bostonas uz Klīvlandi. Puorzaskūlovu, lai palyktu par bibliotekaru.
Kas tei Bostona, kas tei Klīvlande? Divys ameišu lelpiļsātys. Pa eistam daudzu piļsātu mudžeklis. Padūmojit, kas nutics ar Reigu? Nu Slūkys da Ādažim, aiz Salaspils leidz pošai Jelgavai vīna vīneiga piļsāta. Tai tys ar Bostonu ASV austrumu krostā. Tai tys ar Klīvlandi pi Lelajim azarim, pi Kanadys rūbežys. Doba cīš leidzeiga kai Latvijai. Egles, prīdes, kļovi, nav palmu.
Tai – nu reita iz dorbu, vokorā uz sātu. Dīndīnā. Taida tei “soldonuo” Amerika. Guodoj pats par sevi, sīvu, sovim bārnim. Vaļsts – nikuo nadūd. Jam nūdūkļus par tovu olgu, kai iz vysa pasauļa.
Ite rubinej rubineits