Par sevi
![](https://lpr.gov.lv/wp-content/uploads/2007/kultura-w6r7/375.jpg)
Sarunys ar cylvākim Vaļukam veļ arvin pateik. Datikt da laika nūsišonai ar pļuopuošonu ir vīns sūļs, ar kotru runuot naatsaļaunu.
Rokstu tikai iz papeira i cīši lānai (izgoršojūt i ar patyku). Paļdis Dīvam, maņ ar raksteišonu nav juopeļnej nauda, par tū varu tū atsaļaut. Tāņ gataveju publiciešonai pyrms godim 10 saraksteitū. Kotru tekstu redigeju vysmoz 3 reizis, da i atļaunu tam izagulēt, – kab pasavērt, kaids tys izaver izleids nu mygys.
Ādu golvonūeiļ taiseitu bez guņs, zam zemis i viers zemis izaugušu. Pateik vysaidi iudiņa i pīna bez e taisiejumi. Gaļu ādu, no reši, par tū par vegetarīti mani navar nūsaukt. Doru tū par tū, kab napalikt par dogmatiki, a taipoš veseleibys deļ. Kotrā arheologu izroktā piļskolnā Latgolā vysod atrūn divys lītys – muola sučis i dzeivinīku kaulus.
Dīvs radeja šņopsu, a Valns – kleseišonu. Īdzert ritualūs nūlyukūs naatsasoku nikod.
Smīkls īt par cylvākim, kurim latgaliskais dzeivē ir pots golvonais. Taitod jī navā veļ īraudziejuši kūta augstuoku.
Pateik apleicejā pasaulē tys, kas ir atraktivs i dobisks reizē. Taidu izdareit ir voi nu cīši gryuši, voi nu cīši vīgli.
Prostums na vysod ir lobums.
Ar laseišonu ir tai poš kai ar raksteišonu. Vysu piec kuortys losa tikai duraki – daže gaiļs nakņuoboj vysu, kas iz zemis mātojuos. Losu deļ smedzinim i sirds, a na deļ kladem i sekceju plauktim.
Dzeivoju i puordzeivoju grāka sajiutys. Cylvāks vysod var izdūmuot teoreju, par kū grāks vairs navā grāks. Iz taidim cylvākim maņ ir dusmis.
Navā lobuokys vītys par tū, kurā tāņ dzeivoju. Tuolu i eksotisku zemu apsavieršona na deļ manis – ar lidmašynom nalidoju, ar kudžim nabraucu, da i eisti napateik maņ tys.
Nu publicitatis ni bāgu, ni pakaļ tai skrīnu.
Taipoš kai Muorteņš Zīverts piec saraksteituo nūdrukuošonys napamatu nikaidus manuskriptus, papeira strēmelis, bloknoteņus itt. Vysu musornīkā.
Ka vāg īraudzeit, voi uorā leist leits, ir juosaver na iz muokūnim, a iz peļčem.
Nu tod, veseleibā!
12.07.2008.