Muns spāks

Pi Malnuos kanovys,
Kaļovys golā,
Mozuo Krēsleite iudini sovu
Rēzeknes upei
Prīceigi duovoj,
Lelajam Lubuonam sveicīņus syuta,
Pošai izgaistūt Zūsora molā….

Pi pošas Īdeņas,
Lubuona kluonūs,
Pļuovieji bryduši uoriskuos pļovuos.
Svīdrainom pīrem
Izkaptis cyloj…
Itaida Latgolas ainova ruoduos,
Bierneibys eilynam pīdurūt suonim…

Pi tāva pogolma
Aizaļksnis molā,
Verūs dūmeigs ar suopūšu sirdi –
Diervanīnei
Byus kaidreiz atdzimt,
Siermū veitūlu sudobra skovuos,
Bārnim nu rietim eimūt iz školu?

Pi mozuos Krēsleitis
Laipeņas stuovu –
Ite man staiguoja jauneibas sūļi…
Puori parkam
Bazneicas tūrņi,
Svieteibu senejai laimeibai syuta,
Līpai, kur pyrmūreiz tevi es skuovu…

Pi sovys dvēselis
Pīlīku rūku…
Mozuo, bet duorguo pasauļa vīta
Atgrīž man spāku, dūd ceļamaizi.
Ruoduos – as eimu
Jauneibas sūlim,
Aizmierstu ryupes i namīru sovu,
Cereibu jamu – nu krysta kūka…