Medejūs latgalīšu volūdys nabyus i itymā godā

Vaļsts atbolsts, kurs latgalīšu volūdai kai nacionalai i Eiropys mārūga vierteibai ir paradzāts Latvejis normativajūs aktūs, ari 2009. godā tiks ignorāts praksē: vīneigais latgalīšu volūdā raidūšais privatais medejs – Latgolys Radeja – ir puortraucs darbeibu, a Latvejis sabīdriskī medeji ziņoj, ka leidzekli raidiejumim, kas veļteiti latgalīšu volūdys saglobuošonai i atteisteibai, 2009. goda budžetā nav paradzāti.

Lai ari Latvejis Republikā spākā asūšajūs i izstruoduotajūs normativajūs aktūs i politikys plānošonys dokumentūs (Vaļsts Volūdys lykums, Vaļsts volūdys politikys pamatnūstuodnis, Vaļsts kulturpolitikys vodlinejis) ir paradzātys normys latgalīšu volūdys saglobuošonai, aizsardzeibai i atteisteibai, tok itūs normu realizaceja dzeivē nanūtiek.

Bīdreiba „Latgolys Studentu centrs” (LgSC) aicynoj sabīdreibu pīgrīzt viereibu tam, ka latgalīšu volūda ir nacionala i Eiropys mārūga vierteiba, kurys saglobuošonys i aizsorguošonys procesus, kai ari atbiļdeibu par volūdys atteisteibu vaļsts nadreikst izlikt iz sabīdriskuo i privatuo sektora placu.

Seviški aktuala itei problema ir itūšaļt: privatuo radejis staceja „Latgolys Radeja”, kas beja vīneigais latgalīšu volūdā raidūšais masu medejs i beja īgivuse lelys auditorejis simpatejis i snīdze naatsveramu īguļdiejumu latgalīšu volūdys i muzykys, Latgolys latvyskuos identitatis saglobuošonā i atteisteibā, piec 2,5 godu darbeibys ituo goda 30. janvarī translaceju latgaliski puortrauce narentabilitatis deļ. Tys pīruoda, ka bez vaļsts atbolsta privatpersonu realizeituos idejis latgalīšu volūdys i identitatis saglobuošonai i atteisteibai ilgtermeņā myusudīnu apstuokļūs nav dzeivuotspiejeigys.

Jau vairuok godu LgSC rauga itai problemai pīgrīzt kai vaļdeibys, tai sabīdreibys viereibu. Deļtuo 2008. goda 17. oktobrī LgSC vērsēs ar oficialu viestuli Nacionalajā radejis i televizejis padūmē (NRTP), kurā lyudze snīgt informaceju par 2009. godā paradzātū budžeta finansiejumu sabīdriskūs raidorganizaceju lūmys styprynuošonai latgaliskuos kulturys ideņtitatis i latgalīšu volūdys izkūpšonā.

2008. goda 5. novembrī LgSC sajēme atbiļdi nu NRTP (Nr. 01-10/09-1-905) ar ziņuojumu, ka viestule ir puorsyuteita VB SIA „Latvijas Televīzija” i VB SIA „Latvijas Radio”.

2008. goda 12. novembrī LgSC sajēme atbiļdis viestuli nu VB SIA „Latvijas Radio” (Nr. 152/111n), ka vīneigais raidiejums, kurs tīši veļteits itai tematikai, ir raidiejums „Latgale” radejis “Latvijas Radio” 4. programā (30 minoti reizi nedeļā), tok leidzekli latgaliskuos kulturys, ideņtitatis i latgalīšu volūdys saglobuošonai i atteisteišonai 2009. goda budžetā nav paradzāti.

Piec storptautiskūs normativajūs aktūs ītvartūs kritereju latgalīšu volūda piļneibā atbylst regionaluos volūdys statusam, tok piec niulenejūs Latvejis normativūs aktu latgalīšu volūdai ir dūts vēļ nūzeimeiguoks – vaļsts volūdai leidzvierteigs – statuss, partū ka Vaļsts volūdys lykuma 3. panta catūrtajā daļā jei ir nūruodeita kai „viesturisks latvīšu volūdys paveids”.

Vīna nu īspieju saglobuot volūdu 21. godu symtā ir volūdys lītuošona medejūs. Veiksmeiguo i ļaužu atsaceibu īgivušuo Latgolys regionaluos radejis darbeiba 2,5 godu garumā pīruodēja, ka latgalīšu auditorejai ir vajadzeigs sovs medejs voi vysmoz sovi raidiejumi Latvejis sabīdriskajūs medejūs: tys dūd na tikai īspieju kūpejis viesturis i kūpejis kulturys, praksis i idealu apsprīsšonai, a taipat ari socialajai interakcejai, nūdrūšynojūt lokaluos identitatis napuortraukteibu.

Kab nūdrūšynuotu latgalīšu volūdys aizsardzeibu nu pagaisšonys, LgSC uzsver, ka vaļstej juoatbolsta juos plašuoka lītuošona masu medejūs.

Globalizacejis, urbanizacejis, sabīdreibys nūvacuošonys procesi signalizej par tū, ka 21. godu symts byus nūpītns puorbaudejums latgalīšu regionaluos ideņtitatis i volūdys pastuoveišonai. Leidza ar tū LgSC aicynoj Latvejis medejus, vaļsts i pošvaļdeibu institucejis i sabīdreibu suokt diskuseju par īspiejom snīgt leidzvierteigys īspiejis sajimt vaļsts finansialū atbolstu latgalīšu volūdys saglobuošonai, aizsorguošonai i atteisteibai – kai tys itūšaļt teik nūdrūšynuots latvīšu volūdai.

Vaira informacejis:
Ilze Sperga,
bīdreibys „Latgolys Studentu centrs” vaļdis prīšksādātuoja
Mob. t. 29512432
E-posts: lgsc@inbox.lv
Sātyslopa: www.lakuga.lv