Bez tēmas 

LgSC apstyprynoj goda puorskotu i jaunū vaļdi

Vasali!

Nu suokuma cīši lels paļdis Latgolys Studentu centra (LgSC) bīdrim par izruodeitū uzticeibu, atbolstu i motivaceju sasadorbuot sovā storpā, pījemūt svareigus lāmumus – kai kasdīnys dorbā, tai ari kūpsapuļcē!

Maņ ir lapnums par LgSC, partū ka myusu organizaceja nav “kuldys bīdreiba” i nav vīna, pīcu i ni desmit cylvāku apvīneiba, kai ari bīdreibā ir gona cylvāku, kas ir aktivi, dūmojūši, gotovi paust i aizstuovēt sovu vīdūkli, pīsadaleit kūpeigu projektu realizacejā i sasadorbuot, īsasaisteit NVO darbeibā i byut aktivi lūcekli pilsūniskajā sabīdreibā.
Kotram ir tīseibys pošam pījimt sovus lāmumus, tok ari pīnuokums atbiļdēt par jim i saskaņuot jūs ar cytu īsaisteitūs cylvāku grybu i lāmumim.

1) Dati par laika periodu 2008. goda 24. maja leidz 2009. goda 28. februaram
LgSC ir īsastuojuši 9 jauni bīdri.
5 bīdri ir izslāgti nu LgSC.
Ir realizeiti vairuoki leli projekti: koncertu sereja “Taiseits Latgolā”, LgSC regionalūs biroju izveide Daugovpilī, Reigā i Rēzeknē i finansiejuma pīsaiste jūs uzturiešonai, jaunīšu seminars “Atzolys”, sātyslopa Lakuga.lv, myusdīnu dzejis antologeja “Susātivs”, Dzejis dīnu disks “Inflatio Poesis “, kai ari izdareiti cyti dorbi: Latgolys školom izplateiti LgSC izdūtī myusdīnu latgalīšu rokstu volūdys nūsacejumi, Latgolys školom i bibliotekom izplateita gruomota “Susātivs”, sadarbeibā ar Rakstnīku savīneibu dzejis disks izplateits vysā Latvejā, organizeita Sanūs omotu škola Berkenelē sadarbeibā ar Daugovpiļs rajona padūmi i Minskys studentu etnografiskū bīdreibu, Rēzeknē pījimti gosti nu Sibira latgalīšu, nūtykuši koncerti i pasuokumi Daugovpilī i Reigā, Sibirī organizeita Zīmys škola, organizeitys “Susātiva” prezentacejis ar autorim Reigā i Rēzeknē i daudz kas cyts.
Kūpumā bīdreiba ir dorbuojusēs veiksmeigai i projektu realizacejā ir pīsadaliejs daudz juos bīdru.

2) LgSC i pikets pi NRTVP
Piec informacejis sajimšonys par LgSC kūpsapuļcis prīškvokorā paradzātū piketu vaļde napījēme vīnnūzeimeigu lāmumu i aicynuoja bīdrus izsaceit sovu vīdūkli, kab izzynuotu jūs redziejumu i varātu reikuotīs saskaņā ar jūs grybu.
Nūsaceitajā termeņā tyka sajimts puorsteidzūši daudz atbiļžu, kas gondreiž atbylst 50 % nu bīdreibys bīdru skaita.
Tys pīruoda, ka bīdreibā dorbojās aktivi cylvāki, kam ir interese par latgalīšu volūdys i latgaliskuos kulturys pastuoveišonu i kas ir gotovi izsaceit sovu vīdūkli i pamatuot jū.
Prīca, ka bīdri atbolsta bīdreibys vaļdis lāmumus i sekmej juos darbeibu.
Viestulēs paustais redzīņs tyka īkļauts presis relizē, kas LgSC vuordā tyka izsyuteita 27.2. nu reita.
Relīzis teksts, par pīmāru, ite – www.delfi.lv/news/soapbox/soapbox/article.php?id=23357980
Informaceja par nūtykumim apkūpuota ite – skreine.wordpress.com/2009/02/27/lgsc-viduklis-par-piketu-pi-nrtvp/

3) 2009. goda 27. februarī nūtyka vaļdis sēde.
Svareiguokī pījimtī lāmumi:

  • pījimts goda puorskots par 2008. finansu godu;
  • bīdreibā pījimts jauns bīdrs;
  • 5 LgSC bīdri ir izslāgti saskaņā ar statutim – bīdra saisteibu pret bīdreibu napiļdeišona.

4) 2009. goda 28. februarī nūtyka LgSC kūpsapuļce.
Svareiguokī pījimtī lāmumi:

  • pījimts goda puorskots par 2008. finansu godu;
  • īvālāta vaļde: Elmārs Ciganovičs (LKA bakalaura studejis), Muora Mortuzāne (Mg. philol.), Linda Orole (RTU balaura studejis), Ilze Sperga (Dr. philol.), Kristīne Zute (LU magistra studejis);
  • īvālāts revidents Arvis Soldāns.

Bīdra naudys lelums nav maineits.
Piec kūpsapuļcis tyka sareikuots dorbs grupuos.

5) 2009. goda 3. martā nūtyka vaļdis sēde.
Svareiguokī pījimtī lāmumi:

  • īvālāta vaļdis prīšksādātuoja Ilze Sperga;
  • īvālāta vaļdis prīšksādātuojis vītneica Muora Mortuzāne;
  • vaļdis lūcekli vīnuojuos par pīnuokumu sadali.

6) LgSC informaceja škārsteiklā
Kab mudruok i precizuok izplateitu informaceju bīdrim i vysai sabīdreibai, vaira juolītoj škārsteikls.
Teiklā eksistej oficialuo LgSC sātyslopa lgsc.latgale.lv, kai ari atseviška sadaļa lopā www.lakuga.lv – ziņom, rokstim i informacejai.
Ari pošā Lakugā bīdrim juoroksta vaira rokstu par vysaidom temom i juoaicynoj īsyuteit informaceju par latgaliskajim pasuokumim nu cytu cylvāku, organizaceju, pošvaļdeibu instituceju.
Eposts ziņu īsyuteišonai lakuga@latgale.lv (Lakugys redaktors Jurs Viļums, korektore Muora Mortuzāne).
Paraleli ir sataiseits LgSC dīnroksts (blogs) skreine.wordpress.com – ikdīnišķom ziņom, kas na kotru reizi ir roksta voi viestulis vārtys (informaceju līk Ilze Sperga, Marita Papiņa i Muora Mortuzāne).

Tys pagaidam vyss.
Lai daudz spāka i prīcys struoduot i byut!
Lai gona trokuma apsajimt jaunus dorbus i pruoteiguma pabeigt īsuoktūs!

—
Ar cīnu –
Ilze Sperga,
LgSC vaļdis prīšksādātuoja