Latgolys Radejis zinis (07.04.2009.)
Šudiņ nu divim leidz trejim dīnā Daugavpilī, pi piļsātys dūmis, nūtiks protesta akceja, kuruos daleibnīki protestēs pret lelajim komunalūs pakolpuojumu tarifim piļsātā. Protestātuoji taisās pīpraseit pošvaļdeibys vadeibai veikt auditu piļsātys uzjāmumūs, kurī snīdz komunalūs pakolpuojumus, kai arī izdariet tarifu samazynuošonu.
Aizreit Naturalizacejis puorvaļdis Latgolys regionaluos nūdalis Rēzeknis pilialā nūtiks Inpormacejis stuņdis piļsātys i rajona dzeivuotuojim par Latvejis pylsūneibys vaicuojumim, informej Naturalizacejis puorvaļdis Latgolys regionaluos nūdalis vadeituoja vītneica Rita Zommere. Apmaklātuoji tiks inpormāti par piļsūneibys dabuošonys vaicuojumim, par naturalizacejis procesu, par vajadzeigajim dokumentim i par naturalizacejis aizdavumim.
Šudiņ nu desmitim reitā Daugavpils muokslys vydsškolā „Saulis škola” i Daugavpils muokslys školā nūtiks attaiseitū durovu dīna. Interesenti varēs īsapazeit ar školu i izgleiteibys programmom, dazynuot par dizaina izgleiteibys īspiejom, apsavērt „Saules školys” audziekņu kursa dorbu i kvalifikācejis dorbu izstuodi i muokslys školys audziekņu dorbu izstuodi, kai arī jimt daleibu mūdis skatē.
Latgolys apgoboltīsa 27.aprelī suoks skateit kriminallītu par četrkuoršū slepkaveibu Rēzeknē. Jau ziņuots, ka apsyudzeiba par ituo goda 4. janvarī Rēzeknē nūtykušū slepkaveibu calta 1974. godā dzymušajam Andrim Saukānam piec Kriminallykuma 118. panta 2. dalis – par slepkaveibu, ja nūslapkavuotys divejis vai vairuokys personys. Pants paredz vaineiguos personys struopēt ar myuža īslūdzejumu ci breiveibys atjimšonu iz laiku nu 15 leidz 20 godim i ar policejis kontroli iz laiku leidz treis godim, konfiscejūt montu.
