Latgolys Radejis zinis (06.04.2009.)

Itūgod i 2010. godā Rēzeknē planavuots suokt realizēt vairuokus lelus pylsātvidis projektus – pošvaļdeibys planūs ir Atbreivuošonys alejis satiksmis puorvoda (viadukta) rekonstrukceja, Austrumlatvejis radūšūs pakolpuojumu centra byuvnīceiba, Juoņa Ivanova Rēzeknis Muzykys vydsškolys rekonstrukceja i daudz kas cyts.

Šudiņ vīnūs Preiļu golvonojā bibliotekā atkluos divejis izstuodis par 1968.goda nūtykumim Čehejā. Planavuots, ka izstuožu atkluošonā daleibu jims Čehejis Republikys viestnīks Latvejā Juo ekselence Tomāšs Pštross. Dīnys gaitā viestnīks planavuojs arī īsapazeit ar Preiļu piļsātys īvāruojamuokajom vītom.

Reit 7. aprelī nu divim leidz trejim dīnā Daugavpilī, pi piļsātys dūmis, nūtiks protesta akceja, kurys daleibnīki protestēs pret lelajim komunalūs pakolpuojumu tarifim piļsātā, protestātuoji taisās pīpraseit pošvaļdeibys vadeibai veikt auditu piļsātys uzjāmumūs, kurī snīdz komunālūs pakolpojumus, kai arī izdareit tarifu samazynuošonu.