Latgolys Radejis zinis (03.04.2009.)

Kruoslovys rajona zemnīku saimnīceiba „Pakolni” taisās nu biogāzis ražuot elektroenergeju, informej „Pakolnu” saimineica Rimma Romanova. Eiropys Savīneibys fondu leidzfinansātajā projektā biogāzi paradzāts dabuot, puorstruodojūt cyuku syudus i kukuruzu. „Pakolnu” saimnīceibai ir ferma ar 2000 cyukom. Sovukuort kukuruzu planavuots īpierkt, slādzūt leigumus ar citim zemnīkim. Saražuotū elektroenergeju planavuots puordūt AS „Latvenergo”.

Šudiņ vīnūs Rēzeknis Muokslys i dizaina vydsškolys Muokslys nomā nūtiks Rēzeknis augstškolys humanitarūs zynuotņu žurnala “Via Latgalica” 1. numura prezentacejis pasuokums, informej 1.numura redaktore Ilga Šuplinska. Kai pastuostie redaktore, “Via Latgalica” ir īcarāts kai regulars humanitarūs zynuotņu izdavums, kuramā tiks apkūpuoti pietejumi par Latgolys regiona izpētis vaicuojumim literaturzynuotnē, folkloristikā, volūdnīceibā, kulturys viesturē, viesturē, kulturologejā.

Guņsgrākā Daugavpils rajona Naujenis pogostā caturdiņ guojuš būjā diveji cylvāki. Izsaukumu iz guņsnalaimi kaidā vīna stuova dzeivuojamā sātā gluobieji sajēme plkst 13.22. Guņs plūsejuos apmāram 30 kvadratmetru plateibā. Guņsgrākā būjā guoje 85 godus vaca sīvīte i 63 godus vacss veirīts. Nalaimis īmasli teik nūskaidruoti.