Latgolys Radejis zinis (02.04.2009.)
Šudiņ Zemkūpeibys ministrs Juoņs Dūklavs dorba vizitē dūdās iz Latgolu, kur Rēzeknē tiksīs ar graudu audzātuojim i Daugavpilī atkluos atjaunuotū Puortykys i veterinaruo dīnesta Dīnvidlatgolys puorvaļdis sātu. Kai Latgolys Radejai pastuostie Rēzeknis rajona padūmis sabīdriskūs attīceibu specialiste Laura Ieviņa, Dūklavs Rēzeknē daleibu jims Austrumlatvejis regiona graudu audzātuoju konferencē, kū organizej SIA “Latgolys lauksaimnīceibys centrs”, AS “Rēzeknis dziernavnīks” i Rēzeknis rajona padūme.
Tyvuokūs mienešu laikā Daugavpilī cīš sasamazynuos syltuma energejis tarifs. Ja vēļ martā vīna megavatstuņde syltuma energejis lītuotuojim izmoksuo 48,10 latus, tod leidz juļam itū moksu planavuots pamozynuot leidz 39,30 latim.
Šudiņ četrūs Daugavpils rajona Laucesas pogosta kulturys nomā nūtiks Daugavpils naftys puorstruodis ryupneicys ītekmis iz vidi dorba ziņuojuma sabīdriskuos apsprīšonys saīsme. Pārn byuvnīceibys īdūmys autori paziņuo, ka nu sešim leidz 7,8 miljonim tonnu godā planavoj palelynuot Daugavpils naftys puorstruodis ryupneicys jaudu, kurys byuvnīceiba īcarāta Daugavpils rajona Laucesas pogostā.
Šudiņ Preiļu rajona tīsa turpynuos tiemēt lītu par nalykumeiguo alkohola apriti Preiļūs, kuo deļ sasaindejūt ar nalobu alkaholu, 2007. godā dzeiveibu zaudē vairuoki cylvāki. Vakar tīsys sēdis gaitā nūpratynuoti ap 30 līcinīku.
