Latgolys Radeja otkon pīder latgalīšim
23.martā tyka zynoms, ka goda suokumā nūtykušais Latgolys Radejis pierkšonys darejums beidzūt atzeits par nalykumeigu.25.martā nu 15.50 otkon suoce skaneit latgaliska „Latgolys Radeja”. Raideišona nūdrūšynuota īprīškejuos frekveņcejuos Rēzeknē, Daugavpilī, Jākubpilī i Bolvūs.
Juoatzeimej, ka bīdreibys „LR” vaļde (Aņss Ataols Bierzeņš, Agris Bitāns, Anna Rancāne, Guntis Rasims i Imants Slišāns) izsoka pateiceibu Latgolys regionalajim laikrokstim „Latgales Laiks”, „Ezerzeme”, „Ludzas Zeme”, „Novadnieks”, „Rēzeknes Vēstis” i „Vaduguns”, kas vīnotai atsasaceja pi sevi izvītuot nalykumeigai retranslejamuos radejis reklamu.
Bīdreibys „LR” vaļdis prīšksādātuojs A.A.Bierzeņš Latgalīšu kulturys gazetai pastuosteja, ka pyrmūdiņ (23. martā) tyka apmīrynuota SIA „MG Latgolas Bolss“ („Latgolys radeja“) praseiba goda suokumā nūtykušū darejumu atzeit par nalykumeigu. Niu radejis mozuokuma dalinīkim ir tīseibys atpiekrt 75% sabīdreibys daļu par īprīšk nūsaceitū cenu – 66 tyukstušom latu. Radejis darbeibys nūdrūšynuošonai ir planavuots īsaisteit vaira ļaužu, tai tiks garantāts, ka iz prīšku radeja byus eistyna tautys radeja i nabyus atkareiga nu kaida dalinīka vīnpersoniskys darbeibys.
Bīdreiba „LR” izsoka pateiceibu vysim latgalīšim i latgalīšu volūdys atbaļsteituojim, kas atbaļsteja Latgolys Radejis atjaunynušonys akcejis!
