Latgolys pošvoldi sūlej atspaidu latgaliskai „Latgolys Radejai”
2009 gods pebraļa 11 d., Leivuonā nūtyka Latgolys planavuošonys regiona raisteibys padūmis saīsme. Saīsmē pīsadaleja ari Latgolys radejis atspaida bīdreibys „LR“ volda bīdri.
2009 gods pebraļa 11 d. Leivuona Muosklys i omotnīceibys centrī nūtyka Latgolys planavuošonys regiona raisteibys padūmis uoraileiguo saīsme. Saīsmē pīsadaleja ari Latgolys radejis atspaida bīdreibys „LR“ volda bīdri Aņss Ataols Bierzeņš i Guņts Rasims. Jī īpazeistynova pošvoldu puorstuovjus ar situaceju „Latgolys Radejā“ i juos gluobšonys perspektivom.
Pošvoldu vadeituoji pastuosteja, ka nazynova par nalobū pinansialū stati „Latgolys Radejā“ i izruodeja izbreinu, ka radejis leluma sovinīks i direktors Vaļds Labinskais jūs par jū natyka inpormejs. Jī pīzyna, ka vysod irā sapratuši latgaliskys radejis staņcejis napīcīšameibu i byutu meklejuši rysynovumus i davuši pinansialu atspaidu, kab tyktu saglobuota latgaliska radeja i jei nabyutu juopuordūd.
Saīsmis beiguos vairuoki pošvoldu vadeituoji (A.Vaivods, A.Adamovičs, J.Dombrovskais i cyti) izsaceja atspaidu latgaliskuos „Latgolys Radejis“ atjaunuošonys idejai i sūleja ari pinansialu atspaidu bīdreibai itymā dorbā.
A.Bierzeņš, SIA „MG Latgolas Bolss“ akcioners,
bīdreibys „LR“ volda prīšksādātuojs
