Latgolys karūgs
![](https://lpr.gov.lv/wp-content/uploads/2007/muoksla/1908.jpg)
Nu vīnys puses kaids saceis, ka Latvejā vyspuor nav pījimts nūsadorbuot ar provinču karūgu izstruodi, bet, kai zynoms Eiropā tei ir ļūti izplateita paruodeiba pī tam praktiski vysom Latvejis pašvaļdeibom jau ir izstruoduoti gon sovi gierbyuni, gon ari karūgu vizualī standarti.
Pic itaidys logikys jau ir gona dzierdāts, ka Latgolys karūgs varātu byut tys pats visim labi zynomais, Latgolā suokts lītuot koč kod pūļu laikūs, sudobrainais grifs, kas izlykts iz timsi zyla (voi eiropejiski zyla) fona. Piec ituos pošys logikys, bet ar sovu muoksliniciskū variaceji, prīškā guoja jau pīmynātais puiss ar karūga izveidis iniciativu (juo vizualū rysynuojumu varit apsavērt pīvīnuotajā attālā).
Itais variants sajēme nu dažim cylvākim atzineigus vuordus par ideji veiduot fonu ziliboltzylā stilā, bet pi nagativajom pīzeimem var īskaiteit sorkonuos kruosys izmontuošonu i uzroksta pīlītuošonu, kas parosti karūgūs nateik praktizāta.
Tuoluokuos diskusejis zynomā mārā puorstreipova vīdūklis, ka itaidys runys ir „jauna velosipeda izgudruošonys” leiminī, deļtam ka visim labi zynomais pašreizejais Latvejis vaļsts simbols ir izacieļs sovulaik nu Cāsu puses (olūti hronikā), nu kurīnis sovulaik guojuši latgaļu karaveiru pulki, taitod itymā gadīnī latgalīšīm byutu īspieja vēļreiz atguodynuot sovu daleibu pi Latvejis vaļsts i ari juos simbolikys izaveiduošonys. Tod par Latgolys viesturiskū karūgu byutu atzeistams sorkonboltsorkonais karūgs taidā pošā izskotā kai mes tū jau labi asom īpazynuši. Koč kuo sova meklietuojim varbyut rostūs prīšklykumi ka atseviškajam Latgolys simbolam tod pamaineit karūga kruosu proporcejis – kai zynoms suokumā latvīšu karaveiri izmontovuši vīnaida plotuma sorkonuos i boltū pa vydam streipi. Ari pašreizejais „karbīnsokronais” tūņs ari izavālāts laika gaitā… A varbyut var davīnuot pašreizejū gierbyuni (grifu) vydā voi kaidā styurī…
Bet tod atsazeimej ari taids fakts, ka 13.godu symtā Latvejis i Cāsu pusē bejuši daudz vuocu (i varbyut ari kaids austrīšu) bruninīks, kas īspiejams ari tai latgaļu karaveiru vīneibai dalyka sev tyvu kruosu salykumu… Vuordu sokūt nikur jau nav akminī īciersts, ka tei hronika juojem par vīneigū pareizū.
Gols golā latgalim jau da tam bejušys sovys vaļstis kai Tuolova, Jersika, Kūknese… i varbyut nu tom ir palics kaids kruosu voi gierbyuņa simbols?
Taitod paļdis soku visim, kas pastuosteja sovys dūmys i prīšklykumus Latgolys karūga vaicuojumā, bet tys vys veļ lai palīkn aktuals kai par par vizualū izskotu i simboliskū nūzeimi, tai par viesturiskū logiskumu…
Vysa golā vēļ jau vaicuojums ir taids – kas byus tīseigs apstyprynuot itaida karūga galeigū i oficialū rysynuojumu? Voi tys byus juoprosa Latvejis parlamentam? Voi tū varēs izdareit ari Latgolys pašvaļdeibu kūpsapuļce aba juos puorstuovs – Latgolys planavuošonys regiona atteisteibys padūme, kas Dīvamļžāļ vēļ pagaidam nav poša apstyprynuota, kai runoj deļ puors politiskūs i personiskūs interešu.
Kotrā gadejumā aicynoju ari Tevi napalikt molā – izsok sovys dūmys voi nu pi ituo roksta komentarūs voi ari pīzavīnoj breivūs ļaužu apvīneibai Latgolys Saeima.