Latgalīšu modernuo muzyka deju klubūs

Grupa Borowa Mc sadarbeibā ar Latvejis dīdžejim – producentim sovys jaunuokuos dzīsmis pīduovoj ari deju muzykys cīneituojim, prezentejūt dzīšmu remiksus jeb deju versejis.

Aizvadeituos zīmys singlu „Es tevi gaideišu” remiksiejušs divi producenti – DJ Mart Inc i DJ Land. Piedeiguo remiksus īcīnejušs ari deju muzykys radeju klauseituoji, pīprosūt tū pastuoveigu atskaņuošonu i īrindojūt radeju staceju topu viersūnēs.

„Ir pateikamai, ka myusu dzīsmis arviņ bīžuok nūviertej ari DJ, deju muzykys producenti, kas izroksta kaidu īsaciejumu izveiduot sovu verseju kaidai nu dzīsmem. Cīš pateik DJ Land dorbs. Sadarbeibu ar jū nūteiktai turpynuosam,” tai Aigars Runčis, dzīšmu tekstu autors komentej dīdžeju dorbu pi Borowa Mc dzīsmem.

Jaunys versejis radeju klauseituojim i deju zalim topušs dzīsmem gon nu piedeiguo – 2008. goda rudiņa albuma „Ui, lobs!”, gon īprīškejim albumim. Lobuokuos versejis publicātys grupys jaunajā sātys lopā www.borowa.lv. Vysu tī, kas kaidu nu dzīsmem grib atskaņuot radejā ci klubūs, aicynuoti sasazynuot ar grupys menedžmentu iz e-postu borowa@borowa.lv