Kur meklēt

Kur meklēt jāgu?
Tymā vīn, kas beja,
Kū, kai lai cansdamīs,
Vairs aizmierst naīspieju?
Bet kai ar naatgiustamū?

Varbyut vēļ nasaļautīs,
Cīšuok tīktīs,
Kur putyns varu kļyut,
Taids boltum bolts.
Pats sevi otkon giut,
I naēst maizis druponys
Nu cytu rūkys
Tod, kod solts…

I zynuot – grīstu nav,
Kas nūspīž goru…
Vīn bezgaleigais tuolums.
A muokuļi – jī tikai ruodīs,
Jim natici,
I lidoj cauri putnu borā,
Lai pyrmū reizi Sauli īraudzeit!

I apžilbynuots, tūmār speiteigs,
Kai nūreibs taurineits,
Tu liduosi iz ituos dramys beigom
Storp planetom i zvaigznem tuoļi…

Nuoks breids,
Ar pašim spuornu golym jussi –
Tū elpu breineigū…
I cieški saprassi, nu spākim izasitīs:
Tys ari vyss…
Tuos beigys…
Prīškors verās cīt…