Kotram sovs “Leiguo”! / Latgalīšu Gazetys juņa numurs
Itymā godā leiguošonys pasuokumus varēja reikuot vēļ ilguok, deļtam ka pīcu breivu dīnu vērtine ļuove i sasagatavēt, i izaklaidēt, i vēļ ari paspēt atsapyust nu tuo vysa.
20. i 21.junī Ludzys piļskolnā tyka reikuots Lelais latgaļu tiergs ar amatnīku daleibu na tikai nu vysys Latgolys, bet ari nu cytim Latvejis nūvodim. Kai izstuosteja vīns nu ituo pasuokuma organizatorim Eriks Kondrāts, vyss īsadevs vēļ lobuok nakai suokumā īcarāts: naasūt bejs nikaidys sintetikys – ni šašlika, ni vatis i „koka kolys”, vysi bejuši pošu amatnīceibys ražuojumu pīduovuotuoji, bejs ari ols i kvass i vysaidi Latgolys kulinarejis gordumi. Par gūdu tiergam iz vītys beja sataiseits ari ceplis malnuos keramikys apdadzynuošonai. Obejis dīnys dzīsmis narymušys – dzīduojuši Ludzys folklorys ansambli, i reidzinīkim bejuši leli breinumi, ka latgalīši itik daudz dzīšmu sasavuicejuši. Tierga dīnu starplaikā, naktī nu 20. iz 21.juni, tyka sareikuoti ari senejī tautys tradiceju rituali saisteibā ar vosorys saulgrīžim.
21.juņa vokorā sovu leiguošonu tyvuokim draugim Viļānu pusē reikova Zane Stafecka ar saimi. Ari ite pasuokums īturāts tradicionalā gorā: ar leiguotuoju sagaideišonu, dzīsmis dzīdūt, i, caur „bārnu vuortim” izguojuši, visi tūp par eistim Juoņu bārnim, vyss turpynojās ar vainagu peišonu, gunkura vītys īkuortuošonu… vysim beja pīsaceits īsarast tautyskā apgierbā. Pyrms saulis rīta vēļ juopagiust apleiguot sātu, labeibu, bišu drovu, ūzulu i pošu saiminīku. Tod „saulis rīta vuortūs” teik īkuorts vainags – vēļ nu paguojušuo goda palykušais, i, kai saule nūrīt, tai tys vainags teik sadadzynuots. Reizē teik kurynuots golvonais gunkurs, kas tiks sorguots leidz pat saulis lāktam, kod sauleite pasaruodeis trešajūs „saulis lākta vuortūs”.
Vysa nakts paīt leigojūt, doncojūt, rūtaļu īšonā i sovstarpejā apdzīduošonā! Iz reita pusi saiminīks sakurynoj pierti i visi leiguotuoji var ūtru energeji dabuot nu korstajim akminim i zuoļu slūtenis, lai vēļ pyrms saulis lākta pagiutu ari muorkā izamauduot.
22.juņa vokors nu jau ari tradicionali trešū godu tyka īleiguots Kruoslovys rajona Ezernīkūs. Sešūs vokorā beja nalels iergeļu muzykys koncerts Bukmuižys draudzis bazneicā, a tod jau vysu vokoru i nakti muziciešona, dzīduošona, poštaiseituo ola baudeišona, puor gunkuri lēkšona, šyupuošonuos i ar laivu vyzynuošonuos Latvejis solom boguotuokajā azarā – Ežezerā. Pīkusušī varēja izagulēt sīna škiunī. Paļdis juosoka iztureigajim gitarys spielis pratiejim i garmanis muzykantam Pīteram Matuļam, kas iz maiņom spēlēja vysu nakti leidz saulis lāktam.
Piec itaidys vairuoku dīnu īleiguošonys poša Leiguo dīna 23.juņs kliva par formalitati. Bet varbyut ari labi, ka īleiguošona nūtyka jau i puors dīnys agruok, piec senejūs tradiceju, kas stuosta, ka eistuo leiguošona ir taišni 21. voi 22.junī, a na kalendara sorkonajā 23.datumā, kod pasaruoda vysaiduokys skalis pastyprynuotuoju elektroniskuos muzykys, šašliki ar ketčupu, šņapsts i buteļu pierktais ols kai aizdzaramais…
Itī ir tikai roksta autora poša pīdzeivuotī pasuokumi, vys jau ka ari cytuos molu moluos leiguots i ar tradiceju īvāruošonu, i bez tuo. Tok vysleidz kuortejū reizi kai godu nu goda gribīs aicynuot ļauds naaizmierst sovys saknis i tradicejis – ka na „vuords vuordā” tuos puorjimt, tok tod vysmoz īsaklauseit tymuos i atbylstūši izmontuot myusu dīnu izklaidis svātku sviniešonys vajadzeibom!
Lai jiusim sylta i saulaina vosora!
