Katuoļu Bazneica nūpierka “Latgolys radeji”
Par latgaliskuos radiostacejis “Latgolys radeja” īpašnīku klivuse Romys Katuoļu Bazneicys Rēzeknis-Aglyunas dieceze, kas nūpierka gondreiž 100% SIA “MG Latgolas Bolss” īpašuma daļu, ziņoj laikroksts “Diena”.
Īprīkšejuo Latgolys radejis veiduotuoja Valda Labinska vītā par uzjiemuma vaļdis lūcekli klivuse Rēzeknis Katuoļu vidusškolys direktore Marija Mickāne. Kai “Dienai” aplīcynuojs Labinskis, kurs tagad ir atstuojis ari radejis direktora omotu, jaunais īpašnīks sūlejs saglobuot Latgolys radejis stilu i kursu, izjemūt lītys, kurys nav savīnojamys ar Bazneicys miseju. Radejis smoguos finansialuos situacejis deļ tū mieginuoja puordūt jau ituo goda suokumā, tei nūnuoce ar radiokompaneju “Alise Plus” saisteitu Daugavpiļs uzjiemieju rūkuos, kuri tūreiz piļneibā maineja radejis formatu, puorejūt iz raideišonu krīvu volūdā, tūmār mozuokuma daļu īpašnīkim izadeve itū darejumu apstreidēt.