Kas i kam paruodeis valnu iz vacainis?
Cik viņ as i pīmiņu, pīdraudejums – paruodeit valnu iz vacainis – ir bejs vysdrausmeiguokais sūds, kaidu niemies pīmāruot kuorteibys i taisneibys guoduotojs.Ar – valnu iz vacainis – bīdynova naviņ bārnus, a i lylūs cylvākus toža. Valna iz vacainis pīsaukšona beja kai vysvareiguo Dīva sūda pīmāruošona. Kam tai? Nazynu.
Viņ var mineit; ka te īsadorbova tautys kolektivuo zamapziņa, kolektivuo reali napīmynamo atmiņa par kū to nalobu i drausmeigu, var byut par tū peisu blūdi, par pruota apjukumu i nūīšonu paceli , lai nūbailies i soltumā pamiertu … A, var byut par kū to pavysam tragisku voi otkon – bezgola komisku, kas – valna iz vacainis – saniemeju pataisa par apsmūkli cytīm.
Tys byutu tai, atskots iz senejū.
A šūbreid – valnu iz vacainis – vādzātu paruodeit daudzum daudzejīm; lai sasatryukstuos, lai pīsabeistuos, lai apsadūmojuos.
Voi nabyutu juoparuoda valns iz vacainis Latgolys pošvaļdeibu vadeitojīm, deputatīm, školu direktorīm? Cik godu Latvejā atjaunuota demokrateja i cik godu vaļstiski latgalīšu rokstu volūda ir atzeita! A školuos latgaļu mieli i patīsu latgaliskū kulturviesturi navuica. To ir myusīm sovys tautys vara i sovys tautškolys voi nav? Reigā latgalīši i jūs atbaļsteitoji taisa piketus, īsyuta peticejis, dauza Saeimys muojai lūgus … A kū dora Latgolys pošvaļdeibys i latgaliskuos školys? Snauduļoj, lai nasacātu vairuok – guļ sovūs kākūs i prosa – kas te smyrd …
Voi nabyutu juopiketej i juodauza lūgi pi sovuom pošvaļdeibuom pa vysu Latgolu? Voi tādiņ, izvierzūt kandidatus jaunajuos administrativajuos vīneibuos, navajadzātu par golvonū vaicojumu deputatu kandidatīm davest pi sapruota – ka Latgolys školuos ir juoaizsuok latgaļu (latgaliešu rakstu valodas) volūdys vuiceišona; iz reizis ar 1. septembri bez ņikaidys atrunuošonys. I tūlaik puorejais vyss atsarysynuotūs; radeja, televizeja, prese, gruomotizdūšona. Tūlaik vaļsts ņikur navarātu sprukt, ka pošvaļdeibys, tai kai Žemaitejā, struoduotu ar sovu volūdu, kai oficialū vaļsts volūdu. A kas nūteik tādiņ? Cikom runuošona naoficiali, pašvaļdeibu cylvāki ir kai cylvāki, a kai stuojuos pi tribinis voi aizsuok kaidu oficialu siedis vadeišonu, tai vysi čyuļojuos, krīvojuos, a tādiņ – jov i angļojuos.
Kaida valna piec ir juoskrīņ iz reigu protesteit, ka sova pat vara prācavoj pretlatgaliski i mes tam vysam pīkreitam?
Nu, kam to ir juopasūla – valns iz vacainis!
Petru Pīters.
