Kai navīnys rūkys piersti

Asu redzejs cylvākus ar īdzymtu slimeibu, kod rūkuom piersti it kai kotrys dzeivoj sovu dzeivi. Cylvāks tūs navar saviļkt kūpā, navar reizē vysus izstīpt, voi seceigi vīnu aiz ūtra atlīkt vajadzeigajā vierzīnī. Gryuši tai dzeivuot … jyus maņ tok pīkrissit, nuj?

A šūbreid myusu vaļdeiba ar sovuom ministrejuom i sovuom vaļsts akceju sabīdreibuom ir kai taida slyma cylvāka rūka, kur kotra ministreja, kotra vaļsts akceju sabīdreiba īt roznā nu sasaspīsšonuos styprā kulaka sitīnī pa ekonomiskū i politiskū krizi vaļstī. Nazkai biedeigi palīk, kod dzierdi, kod losi i kod jyuti, ka vaļsts, taitod – tautys grybys i varis aplīcynuotoji, nastruodoj kūpeigi sovai vaļstei, taitod – tautai, a gruob cik var i dola cik spiej viņ sev i sovejīm partejnīkīm i kod na viņ pošus pi ituos vaļsts silis datykušajīm.

Mož, kas na viņ dūmuos, ka as izdūmoju, ka as apgrieceigi naslavi ceļu myusu vaļdeibai? Nu, to padūmojit par itū, ot, padūmojit!

Latvejis Bankys prezidents, acss namyrkšynuodams, aplīcynoj, ka Bankai latu pīteik, tūs asūt 100% rezerve ar zalta sagumu uorvaļstu bankuos. Nu, kam zemnīkam itys stabilais lats ar vysu zalta sagumu, ka jis nateik pi tuo, lai varātu turpynuot sovys ražuošonys nūstabilizeišonu?

Vysu zyn ar kaidu miļjonu i symtīm tyukstūžu peļni struodoj vaļsts akceju sabīdreibys: Latvejis vaļsts meži, Latvejis dzeļžaceļs, Latvenergo i vieļ cyti … A vaļdeiba klīdz, ka tryukst naudys, ka, niu, tei juoaizanam nu pasauļa. Tymā pat laikā peļnieteiguos ministrejis nu sovīm miļjonīm škeruos na vaļsts kūpejam budžetam par lobu, a peļni izsvaida pa labi i pa kairi; sovys partejis atbaļsteitojīm, rodīm i draugīm, vysaidai izklaidei …

Slymus cylvākus uorstej. Tai sabīdreibā pīnymts. A dieļ kuo mes nauorstejam sovu vaļsts vari? Voi nav kam? Voi ta vysi mes kai saslymušī – kotrys iz sovu pusi?

Petru Pīters.