Izlein uorā
![](https://lpr.gov.lv/wp-content/uploads/2007/kultura-w6r7/375.jpg)
Raksteišona vysod ir inficiešonuos – mozuoka ci leluoka. Vysbīžuok nadaudz baciļu prīšk vysa organisma ir tikai iz lobu. Tod, ka ir pošam loba imunitate i organisms navā slyms.
Es te rokstu tikai par attīceibom storp autoru i tekstu, par vysu puorejū pruoveju aizmierst. Par attīceibom, kurys ir vysmozuok prognozejamys i kaut kai ar vuordim aprokstomys.
Ka tu roksti par slapkauni i grybi, kab sasaraksteitu labi, pošam ir koč drupeit juopalīk par taidu šaidu slapkauni.
Na čuguna dybyns ir prozaiķu orūdslimeiba, bet gon inficiešonuos ar tū, kū tu roksti.
Lobs policists breinuos, ka ar kotru dorba godu jis pats palīk vairuok i vairuok lykumpuorkuopiejs.
Skaidrs, ka bitinīkam voi celtnīkam ir vīgluok. Tys, ar kū jī inficējās, nav tik riskanti kai sūdnīkam voi muitinīkam.
Vīns naviereigs sūļs, – i tu jau esi natymā pusē. I, pats trokuokais, – tū eisti navari pots pamaneit.
Izlein kai eilyns, kuru iz mugorys nes maisā. Kai tovs susātivs, kaut ari pi debešim ir tikai saule i apliek nivīna. Kai golvys suopis, kuru cālūni navar nūsaceit nivīns uorsts.
Kod tu tū suoc, tu nimoz nazyni, ka tys tai byus. A kod zyni, palīk baiļ. Navys vīnkuorši baiļ, bet tai nasaprūtami baiļ.
Raksteit tekstu i skaiteit tekstu navā vīns i tys pats. Ari izskaiteitais pamat iz myusu sovu īspaidu, palīk myusu volūdā, smedziņūs i ari cytu reiz sirdī. Pat na golvys smedziņūs, bet nazkur mugorkaulī, nazkur tai saucomajā zamaškapzinī. Bet skaiteitais, jo tei navā mantra, navā religisks teksts, bet gon kulturys voi nazkaids cyts teksts, myusus naīspaidoj tik styprai kai taids, kuru tu pots saceri i ītylpynoj volūdā.
Kuru tu pots izdzeivoj, partū ka sovaiduokus tekstus raksteit navā nūzeimis.
Tys ir tai poš kai vērtīs aizbraukušam iz tuolu zemi iz eikaliptim voi iz kaštanu, kuru tu pots moziņks īstuodieji lūga prīškā.
Iz… Iz…
Maņ ruodīs, ka vacūs laikūs puorsoku izdūmuošona vaira beja vajadzeiga pīaugušajim nakai bārnim. Kab pīaugušī trenietu sovu fantazeji i restaureitu sevī dūmu, ka lobais vysod uzvar. Kab styprynuotu sevī radūšū dūmu, izatāluošonu i emocionalitati.
Bārnim fantazejis i izatāluošonys pīteik pošim. Jīm vajadzeigs tikai vīns – kas ir labi i kas ir švaki. Kas ir bejs da šam.
Ka pīauguši cylvāki sovim bārnim vairs navar voi nagryb izdūmuot puorsokys, tod nazkas sabīdreibā navā kuorteibā.
Byutu juoizdūmoj, – koč ar maisu iz placim. Koč ar baimi inficietīs.