Foto nu Labdareibys koncerta

Koč i gavieņa laikā, tak 19. martā – iz Jezupa dīnys – latgalīšim ir atļauts izavest tai paskaļuok, deļ tam itei dīna beja podlaseita, kab Reigā Kongresu nomā sareikuotum latgalīšu muzykantu labdareibys koncertu četru stuņžu garumā latgaliskys Latgolys Radejis atjaunynuošonai.

Kab aplīcynuotu latgaliskys „Latgolys Radejis“ napīcīšameibu, Reigys koncertā pīsadaleja daudzeji latgalīšu muzykanti: „Bez PVN”, „Crust”, „Dabasu durovys”, „Dzyga”, „Green Novice”, „Latgolys dāmu pops”, „Likteneigais pagrīzīņs iz Vainovu”, „Maskačkys spieļmani”, Biruta Ūzuleņa, „Patrioti.lg”, „Peec lietus”, „Restauratori”, „Grodi”. Juoatzeimej, ka vysi muzykanti pīkryta pīsadaleit koncertā bez moksys, ari sovus uzaturiešonys i ceļa izdevumus jī sedze poši.

Koč pyrms pasuokuma jau beja izziņuots, ka īsokamais zīduojuma lelums ir 5 lati nu cylvāka, tak ari mozuoki zīduotuoji natyka dzeiti pa celi, deļ tam Reigys Kongresu noma lelais zals beja, tai saceit, „bez 5 minotu” pylns.

Pi īīšonys durovu, tyka saorganizāts ari nalels tierdzeņš ar latgalīšu muzykys īrokstim.

Bīdreiba „LR” izsoka pateiceibu vysim Reigys latgalīšim i latgalīšu volūdys atbaļsteituojim, kas pīsadaleja Jezupa dīnys labdareibys koncertā voi cytaiž atbaļsteja Latgolys Radejis atjaunynušonys akcejis! Teik planavuots, ka piec gavieņa i Leldiņu tiks turpynuoti latgalīšu muzykys labdareibys koncerti ari vysūs leluokajūs Latgolys mīstūs: Preiļūs, Rēzeknē, Ludzā, Bolvūs, Kruoslovā, Daugavpilī i Krystpilī.