Dzejneica Marija Andžāne īdvesmoj „Sovvaļnīku”

Muzykalais projekts „Sovvaļnīks” izdevs pirmū dzīsmi „Pats sevī dzeivs”, kai izdzeivuošonys programmu pret krīzis radeitū depreseju. Sarunā ar „Latgalis Laiku” „Sovvaļnīks”, kurs nagryb afišeit sovu vuordu, stuosta par jaunū dzīsmi i albumu, kurš sauksīs „Sūplok” i iznuoks itymā vosorā.

Kuodeļ asat pajiems taidu pseidonimu “Sovvaļnīks”, i kū tys nūzeimej?

Vuordu „Sovvaļnīks”, cik atcerūs, īteice draudzine, i maņ pateik, kai vuords skaņ i kū nūzeimej. Vuordam nūzeimis ir vairuokys, i kotrs pats var atrast internetā voi vuordineicā. „Sovvaļnīks” vīnkuorši atbylst munam prīkšstotam par tū, kai asu voi beju, voi byušu.

Kod dzyma ideja par albuma izdūšonu?

Šūgod ir lela jubileja dzejneicai Marijai Andžānei, sovukuort maņ jau seņ beja dažys dzīsmis gon ar Marijis tekstim, gon ar cytu latgalīšu autoru vuordim, partū i tyka nūlamts raudzeit apkūpuot goradorbus i varbyut pat izdūt vasalu albumu, kur golvonais ir dzeja.

Par kū stuosta pirmais singls?

Tei ir sova veida izdzeivošonys programma, vīnkuorši tymā pat laikā naīspiejama – saprūti pats sevi i atsasoki nu vysa līkuo.

Kaida nūzeime ir planavuoto albuma nūsaukumam „Sūplok”?

Vyss, kas ir ap mani, zem manis, viers manis, tys vyss ir blokus.

Kai atrodot dzīsmu tekstus?

Tekstus paleidzēja atlaseit filologejis doktore asoc. prof. Ilga Šuplinska, kai ari modernūs autoru tekstus piec pošu īteikuma i viertiejuma par sovim tekstim.

Kū dūmojat par krīzi? Voi tei īsazoguse arī muzykys pasaulē?

Nikuo loba par krīzi pasaceit navaru. Jei vīnkuorši līk meklēt rysynuojumus i sova veida izdzeivuošonu i vierteibu puorviertiešonu. Ari muzykā nūteikti ir krīze, koč voi tai, ka nav sponsoru albumim, ari koncertu nav. Leidz ar tū daudzim muzykantim juodūmoj, kai vīnkuorši nūpeļneit iztyku. Vīglai nav.

Ar kū nūsadorbojat ikdīnā?

Ikdīnā struodoju daudz kai docents, audzynoju dālu, klausūs metalu, siežu iz azara, kur giunu zivs, i bļaustūs mežā.
Nūvieleju vysim palikt dzeivim vysmoz pošim sevī.