Dūrbuļuošonuos / O.Slišāns
As pīmiņu nu bierneibys laikīm, kod gonūs guoju, muote ar tāvu vysod styngri pīkūdynova: „Tu gonūs asi ar lūpenīm kūpā vysu laiku, nadūmoj kur na viņ nūleist pļovys molā dūrbuļuotu. Tai tu rozzaudeisi sovu gonomū pulku, voi pītaiseisi taidys škodis, ka daīs „bārza putra” vuoreit.”Nuj. Dūrbuļuot vīnatnī voi ar sābru gonīm patyka. Vyss aizamiersa. Vareja tupeit zam kaida kryuma voi akmiņu krostā i vāruot kūkaceišus voi spieleitīs ar zviergzdīm, kūku lopuom i zarenīm.
Kū tys vuords – dūrbuļuot eisti nūzeimoj, as vieļ naasu saprats leidz šūdiņdīnai, nu zamapzinī ir īsasieds tāva i muotis pīkūdynojums – asūt sabīdreibā, a lai kaida tei byutu, nadreikst byut vīnam voi viņ ar nadaudzejīm, naradzūt i nadzierdūt apleicīnis.
A mes latgalīši, voi pareizuok – latgaļi, kuo navar saceit par latgalīšīm – krīveišīm, dūrbuļojam kotrys sovā akmiņu krostā voi lozdu kryumā …
Saceisit – nā? Ir tai, ir! Vysi ceņtīni itū kotra sovpatū dūrbuļuošonu aizstuot ar vyslatgaliskū kūpdorbu ir, myusdīneigi izasokūt, bankrotejušs.
Pīminit kai beja ar Osvalda Zvejsaļnīka vadeitū Latgolys Kulturys centru 20. gs. ostoņdasmytūs godu dabeigūs? Tai – namonūt i nadzierdūt nazkur pazuda. Dieļ kuo? Prosta vysīm gribejuos dūrbuļuot, a na īt pasaulī vīnuotā styprā kulakā. Cik viņ lobuma, ka Juoņs Eļksnis uzajieme Latgolys Kulturys Centra izdevnīceibys vadeišonu i dora tū da šam laikam. Cik viņ lobuma, ka cikom vieļ nabeja rozbāgušs kotrys pa sovuom dūrbuļuošonys vītuom, paļuove Osvaldam Zvejsalnīkam reikuotīs Latgolys Muorys pīminekļa atjaunuošonā. A tuoļuok … suocies zūbu grīzšona i bļausteišonuos, ka Osvalds Zvejsalnīks pasakļuove dūrbuļuotoju vairuokumam i pats dūrbuļojuos viņ pa sovu muokslys i muokslys izgleiteibys pļaveni, a LKC vairuok nav. A jū to dybynova puorstuovi nu vysys Latgolys; intiligenti ļauds nu vysuom kulturys, muokslys, izgleiteibys i saimistiskuos dzeivis.
Pīminit kai beja ar Valda Lauska auklejumu i vieļuok vadeišonu, vysu Latgolu puorstuovūšajuos organizacejuos: Latgolys Padūmi, Latgolys Demokratiskū parteju? Kai vesala i ražeigi tyka suokts! Cik daudzi tyka izdareits i saplanavuots tuoļuokai darbeibai! Šūdīņ tū vysu pīminūt, až smedzini tierpst … A beiguos – ša te: „Kas tys taids Lauskis ir? Kam myusīm juo juosaklausuos? Kam myusīm bolsuot par juo sarokstu? Ir myusīm Saeimā Latgolys deputatu apvīneiba. Latgolā jov ir vīņs plošs veidojums – Regiona planavuošonys padūme, kurā ir pīspīdu kuortā īsasaistejušīs vysys Latgolys pošvaļdeibys …I tai – goņ Padūmi, goņ parteju, dūrbuļuotoji pīleidzynova Valda Lauska it kai personeigajai delai i pazudynova. A cik žāļ! Kai tādiņ taida Padūme i parteja nūdereitu, kura jov byutu bejusi īsastruodovusīs i īsadzeivovusīs!
Tej poša dūrbuļuošonys kaite apsādusi i kulturu. Kai labi 3. Atmūdys pošā korstumā literaturkritiks i dzejnīks Osvalds Kravaļs ar vāluokū filozofejis profesoru Pīteri Laizānu beja precizi da seikumam izstruodovušs Latgolys ( voi latgaļu)
Kulturys bīdreibys dybynuošonu i ražeigu darbeibu pošā Latgolā ar sovpatū Veči – vacūs i gudrūs latgalīšu pruota vīneibu. Nu ņikas nasaguoja. Dybynuošonys kongresā Zaķusolā Reigā vysus politiski apmaraceja Juoņs Streičs ar sovu daiļruneibu i tyka nūdybynuota Latgalīšu Kulturys bīdreibu Savīneiba. Tai tod – otkon tyka paļauta, politiski paļauta kulturaluo dūrbuļuošonuos kotram pa sovu sātmali pi sova viņ gonompulka.Tai tei Savīneiba i nūpluovova Daugovys yudiņūs …
A, kas beja ar Latgolys Televizeju? Tai labi vyss guoja. A ka vaļsts nasuoka atbaļsteit, ka vādzeja dūd naudu, voi pasyuteit moksys raidejumus kotrai Latgolys pošvaļdeibai, lai Latgolys TV nūsatureitu, pošvaļdeibu „kieneni i kienenīnis” ar sovīm sulainīm naudu pažālova. Jūs atsaceiba skaneja tai:” Kam myusīm pasyuteit kū na viņ Latgolys TV, kuru radz nalels kaits, ka varam sevi izruodeit vysai Latvejai Latvejis TV Reigys kompanejuos.
Tuos pošys dūrbuļuošonys dieļ bankroteja latgaliskuos avīzis: „Mōras Zeme”, „Latgolas Bolss”, „Zemturs”, laikam – i „Graidi”. Iz vīnys rūkys pierstīm vareja saskaiteit bibliotekys, školys, pošvaļdeibys, kurys aboneja itūs latgaliskūs laikrokstus.
Kū lobu var pasaceit dūrbuļuošonys izskauzšonā? Labi nūstruodova Latgolys Regiona Atteisteibys Agentura, ka sanāmusi sovā apryupī VKKF naudu Latgolys Kulturys programmu konkursīm, spieja puorvareit dūrbuļušonys lipeigumu i itī agenturys projektu konkursi ar kotru godi īt plošumā i plošumā, atbolstūt Vyslatgolys pasuokumus, voi projektus, kuru eistynuošona navar tikt dūrbuļuota vīnā vītā, a nu tuo īgyust vysa Latgola, vyss latgaliskais.
Dūrbuļuošonys virusu neidej i latgaliskais internets; kai www.lakuga.lv i Latgolys Radeja. Kas, tei nabeja dūrbuļuošonys apkaruošona, kod icik daudzi latgaļu – jaunūs i vacuoku īsastuoja par Latgolys Radejis latgaliskuo varianta atjaunuošonu? … a Latgolys pošvaļdeibys kluseja i klusej – vairumā, turūtīs pi slimeiguo dūrbuļuošonys natykuma.
Tau tys ir i ar Latgolys pošvaļdeibu presis izdavumīm; biletenīm i avīzeitiem. Kurā nu juom jyus atrassit myusu latgaļu runu, myusu volūdu? Gondreiž – nivīnā.
Nu 20. gs. deveņdasmytajīm godīm Daugovpilī dorbojuos Latgolys Pietnīceibys Instituts, kura dorbs nu ņikai nav saucams par dūrbuļuošonu kaidā vīnā akmiņu krostā! A, vaine jam ir. I lyla vaine.Akademiskī zynuotnīki insatituta darbeibu beigu beiguos tūmār podvylka zam Daugovpiļs Universitata „deča”, tai naļaunūt jam izaugt par spāku, kurā īsaklauseitūs na viņ Latveja, a i pasauļs.Pi kam vysi naakademiskī pietejumi, tai i nūzyud piec konferenču dabeiguom, tī nateik nūpubliceiti, tai tod – atzeiti par navierteigīm.
Nuj. Latgaļi dūrbuļoj kotrys sovā partejā, tai Saeimā ītikšona viņ mozumeņam – pamatā tīm, kuri napastuov par Latgolys styprumu.
Nuj. Latgaļi vysi kai vīņs nav vieļ cālušīs i krytušs par sovu runu (volūdu), kuru zynuotniski, kod vieļ i napiļneigi, ir īlykušs volūdnīceibys zynuotnis plauktūs i izstruodovušs myusdīneigu ortograpeju – lai mes sovīm bārnīm i unukīm tū varātu vuiceit školuos. Nā, mes turamīs sovā dūrbuļuošonā, sovā runeicā voi volūdā, kas nav myusu …
A cik to iļgi Latgolai latgaliskai izbeigt pastuoveit? Naiļgi! Poši izbraucam, zemi izpuordavojam, volūdu aizmierstam, tykumu izsmejam, viņ šmakovceņu dzeram i vaimaņojam par tū, ka myusu dūrbuļuošonu suoc izsmīt i vaļstiski, i Esiski izneideit ar vysīm finansialajīm spākīm kai kaidu lipeigu lygu …
Voi vierts dūrbuļuot i tuoļuok?
