dūmu pylni pogolmi/decembris
Lobōk narunoj. Tovs bolss smaržoj pēc cementa. Bet kai tod sovaidōk? Manī remonts. Goda nūgalis revizeja. Svīžam vacū ōrā un līkam par jaunu. Žāļ tikai, ka navar izavēlēt. Vyss nūteik par reizi. Nivīns naīlyudz dūmys, nūtykumus. Vyss nūteik “eksprontom”. Tod jau termins – dzeivis gudreiba – ir dīzgon trausls sovā maineigumā. Voi tys ir labi voi slyktai? Tys jau ir cyts vaicōjums, cyta tema, cyta revizeja.
Es asu Igaunejā. Kamer remontejūs. Gryuts, prūtams, aptvert. Tai godōs. Ar mani nazdeļkuo vysai bīžai. Es nagrybu žāluotīs, bet taidūs breižūs maņ pītryukst reiceibys strategiju. Tod stōvu kai Spreideits svešumā. Verūs tōlumā. Plyki bārzi, sasoluse zeme. Voi tei vēl muna? Un bosom kōjom aizīt laime. Nav gulbeiša, kas kustynoj spōrneņus. Nav burvju gradzana. Laikam tai vajag.
Igauniskō mentalitate lānai apād mani. Es ļaunūs. Bryunom acim verās, vaicoj, kai maņ īt. Bet maņ tikai korsts. Tikai korsts. Sadag cements un bulta trōpa mērkī. Vēļ tikai vīnu reizi sirds paspiej sasaraut. It kai grybādama saceit: “Nā! Maņ jau gona!” Bet nivīns nasaklausa. Pat kaimineica Sirdsapziņa.
Lānai atdzīstu. Nu jauna sakorsuse. Varātu pōragrū kiulu dadzynōt. Vysa kod par daudz. Tu laikam audz. Gorā. Patvaļeigys revizejis taišni kai antiviruss pošys par sevi izpeļd.
„Threat detected!”
Atver failu, apsaverīs! Varbyut Tu tur esi. Ar sovim nūlōdātajim ezeišim. Tod savōc jūs. Kamer nu Igaunejis nav atbraucs glōbšonys dīnasts. Mani glōbt. Ar igauņu plāksterim apleimeit. Pēc divom nedeļom ar smeldzi jōraun nūst. Bet tod vysmoz rātys napalīk. Tikai atminis. Korstys. „Re, kaida Tu!” īsasmej Sirdsapziņa. Tū var sajust. Kod sirds ōtrōk syt. Tod tei ir Sirdsapziņa. Kur tod ir Mīlesteiba? Vysapleik. Un ari smogai kliust. Kaids pīsyutiejs pylnu sirdi e-postu. Bet zonys nav, nav globalō interneta, nav savīnōjumu un es tai ari nauzzynu, kas maņ roksta. Tikai nūjaušu. Tai staigoju pylna ziņu. Nūjauzdama un mynādama.
Zini, bīži vīn varam sevi redzēt nu molys. Pasoki, deļkuo tod kauns palīk par sevi? Ja dzeive tik vīna un nav laika meklēt plagiatus. Kas tys par instinktu? Eh, voi nav vīnolga. Es drusku nūignoriešu vysys īkodātōs sajiutys. Pavārōšu sevi, pavārošu Tevi, pavārošu myusus. Un myusus pavārōs. Nikō nascēs. Tikai padūmōs. Re, nav nimoz tik tragiski, kod redzami nu molys asom. „Re,kaidi jius!” Sirdsapziņu tuseņš ir sōcīs. Tik daudzys jōs. Kotram sova, kotram vīna. Un vysys iz vīnu rūku.
Sasasauc. Un deļtuo myusim rōdīs, ka vīns ūtru saprūtam. Skaistai. Na-a?
Un tai es bosom kōjom aju. Nav solts. Mīlesteiba sylda. Ceru, ka satikšu vēļreiz. Ceru, ka uzrunōšu vēļreiz. Es pasceišu vysu, kū dūmoju, es pasceišu vysu, kū jiutu. E-posti atsavērs un sadegs. Cementa vairs nabyus. Mes sadegsim Mīlesteibā.