Dabasu Durovys pīduovoj jaunu dzīsmi

Latgalīšu rokgrupa „Dabasu Durovys” pīduovoj jaunuokū dzīsmi „Tai tam byus byut!” Vaļuka dīnys nūskanis radeišonai. Itei dzīsme ir pyrmais skaņdorbs, kas radeits piec pārn seņtebrī izdūtuo grupys pyrmuo albuma „Ļepetņīks”.

Dzīsmis „Tai tam byus byut” teksta i muzykys autors ir Arņs Slobožanins. Dzīsme īraksteita skaņu īrokstu studejā „PAKAC”. Īrokstā daleibu jēme Juoņs Veliks (bungys), Uģis Vilcāns (bass), Arņs Slobožanins (gitarys), Egils Kulmanis (saksofons), miksu i māsteringu veice Armands Treilihs.

Grupys „Dabasu Durovys” dalinīki par dzīsmu stuosta, ka tys ir bejs cīši naparostai i naīrostai turpynuot īrokstus piec tam, kod tyka izdūts albums. Jaunajim gobolim gribiejīs dašaut kū naviņ eipašu. Dzīsmē drupeit paeksperimantāts instrumentu partejuos, saļtim tī izīt nu rāmjim, tūmier vīns ūtru papyldynoj – vysmoz tai ruodīs pošim muzykantim.

Dzīsme „Tai tam byus byut” radeita pārn vosorā. Suokumā bejus muzyka i piečuok vuordi, kuri roduos drupeit puorvarejūt sovu patmīleibu – partū īt nu sirds… Grupys „Dabasu Durovys” muzykanti atzeist, ka tys ir tys, kas vajadzeigs Vaļuka dīnys nūskanis radeišonai.

Grupa „Dabasu Durovys” izveiduota 2006.gods suokuos Daugovpilī. Pa itū laiku grupa ir jāmus daleibu vairuokūs jaunūs grupu konkursūs, snīgues ap 60 koncertu dažaiduos Latvejis vītuos. 2008. godā grupai izdūts pyrmais albums „Ļepetņīks” i vīnlaikus televizejuos pasaruodeja grupys pyrmais videoklips „Trejūs naktī”.