Bruolāns ar divim gaterim

Irā maņ vīns taids draudzeņš, Juoņs–komersants. Sasateikom na bīži, bet tai nagaideiti. Kai divi zaltrači pi apkluota golda, piec tam kod vairuokus mienešus kotrs ir struoduojs sovā pusē.

– A es tev pasceišu, par kū tys tai saguoja, – jis maņ soka kaidā aizpušdīnē.

– Rēzeknis rajonā maņ dzeivoj bruolāns. Beja jam divi gateri. Grīze nu bolkom brusys i dieļus, a ar skaidom kurynuoja sovu syltumneicu. Pyrms godim četrim puordeve obus gaterus. Nu reita jam struodnīki juoatvad, ciersmys vajaga nūpierkt, izcierst i apstuodeit, pots sev par gruomotvedi, mašynu vajag atrast, ar kū iz ūstu produkceju aizvest. A sābrūs dzeivoj Dyņuks, nikuo nadora. Pyrms laiceņa nūpierka Juglā dzeivūkli, tod puordeve. Nūpeļnēja treis reizis vairuok nakai bruolāns. Dalyka i par itū naudu nūpierka jau divus dzeivūkļus… Dzeivoj Dyņuks! A kas, muns bruolāns par jū glupuoks? Agregatus metalklomūs nūdeve, kuormus puordeve par pusi cenys. Ari nūpierka placeiti pi azara. Piec goda itū placeiti puordeve, aizbrauce apsavērt piramidys, nūpierka jaunuoku mašynu i otkon placeiti pi azara. Piec goda… A pyrms nedelis beja pi manis atbraucs. Prasēja, lai pažīčeju 80 latus. I cik labi byutu, jis maņ stuosta, ka jam byutu palics kaids gatereits.

Piec juo stuostiejuma kaidu minotu klusejom.

Tod es jam izstuostu, ka 17. godusymta 30. godūs Holandē par vīnu tulpu seipūleņu kilagramu deve vairuokus kilagramus zalta. Puordeve sātys, kab nūpierkt itūs nu Turcejis atvastūs breinumus. Kab vieļuok jūs puordūt i navys apsastuot, bet otkon nūpierkt divreiz vairuok tū tulpu seipūlu. Puordeve patmalis, darbneicys, teirumus ar vysu labeibu, tipografejis. Izstuostu, cik cylvāku piečuok pasakuore, kurim sātā beja maisim tulpu seipūlu, bet nabeja par kū nūpierkt maizi i ryugušnīku.

– Divys lītys tikai vēļ varu pasceit.
Kod jis suoc tai runuot, es jau zynu, ka myusu runuošona mudri beigsīs.
– Kotra paaudze, kū tī, kotrs cylvāks vuicuos vīneigi i tikai nu sovys poša pīredzis.
Es pasoku, ka na kotrs i nu sovys pīredzis vuicuos.
– I ūtrs. Tev par itū vysu vajadzātu saraksteit romanu! I na tikai par munu bruolānu. Es tev varu daudz kū pastuosteit.
Soku, ka vajag, koč i labi zynu, ka izfantazeit ir vīgļuok. I lobuok saīt. Ka maņ juo ideju navajag, ka maņ pošam planu pīteik iz desmit dzeivem.

– A vīnam munam klasisbīdram beja veikals… – jis otkon.

Bet pīraksteit kūta vajag.
Partū ka tod, kod dag sāta, atskriejušim cylvākim nav nūzeimis stuosteit par pyrms pusstuņdis kucei pīdzymušim kucalānim.