Breivdobys muzejā čyguoni nu Upītes

Pyrms godu mijas Upītes Jaunīšu folkloras kūpa “Upīte” puorsagierba par čyguonim i brauce iz Reigu iz Breivdobys muzeju paleidzēt cytu Latvejis nūvodu čyguonim, kekatnīkim i budēlim jūs bādu bluči viļkt.

Na par veļti myusim latgalīšim taidys tradicejis kai grāku bluča viļkšonys nav, mes tok asam loba i mīreiga tauta, a puorejīm Latvīšim laikam vaira saīt grākuot, deļ tam i saulgrīžūs juodadzynoj vyss nalobais, kas pa godu sastruoduots.

Upītes čyguoni izdancynova vysus, kurus satyka. Bejom poši prīceigi i izaviere, ka puorejīm ari cīš patyka!