“Borowa Mc” nūslādz 2009. godu ar pozitivu muzykalū bilanci i Goda koncertu

Pādejū reizi 2009. godā kluotīnē grupu fani varēs dzirdēt 19.decembrī grupys Goda koncertā klubā „Četri Balti Krekli”. Grupa „Borowa Mc” 2009.godu nūslādz ar pozitivu muzykalū bilanci i jau gatavejuos 2010. godam. Jaunais gods byus eipašs pīcu godu grupys pastuoveišonys jubilejis deļ.

“2009. gods ir bejs cīši radūšs. Dūmojūt iz prīšku, asam saceriejušs daudzys aizkustynūšys i aizraujūšys dzīsmis. Carams, tuos tyvuokā laikā varēsam pīduovuot klauseituoju vietiejumam. 2009. godā sataisejom divus video klipus dzīsmem “Pavasars” i “Bez Tevis”, kas ir cīš lobs sasnīgums.Sokom paļdis vysim, kas atsasauce Sirsneibys mieneša aicynuojumam i pastuostieja sovus stuostus par mīlesteibu,” atsaverūt iz 2009. godā padareitū, atzeist solists Aigars Runčis.

Itūgod grupa izsuokuse koncertēt ari akustiski. Īspiejams, tyvuokā laikā byus vareiba dzierdēt, kai “Borowa Mc” izaklausa gitarys i tausteņu pavadiejumā. Grupa veiksmeigai nūspieliejus vairuokus koncertus, eipašai atmiņā paturūt uzastuošonu Preiļūs i Varakļuonūs.

“Rudiņa koncerti maņ nese jaunu pīredzi i dūmys par latgalīšu i latvīšu muzykys situaceju Latvejā, bet vysvaira itūgod maņ patyka fiļmētīs klipā “Bez Tevis”. Tod beja īspieja stuovēt Reigys lelajuos īluos i pat pi reizis pasarunuot ar garombraucūšajim šoferim”, interesantuokuos 2009. goda šaļts pīmiņ gitarists Ingars Gusāns.

Taipat izsuookta Latvejis deju zalu īkaruošona, sasadorbojūs ar dīdžejim, kas radejušs deju versejis grupys dzīsmem.

„Nu 2009. goda pīminē palyks spylgtuos šaļts taišni nu pīdzeivuotuo vosorā. Cikom cyti sauļovuos i baudieja vosorys breineibu, mes dorbovamīs kai nu kurs. Vīns pi klavīrem, cyts pi gitarys. Lykom kūpā idejis, tekstus, nūts, akordus, vuordus… Vysu, kas tymā breidī beja sokoms klauseituojim,” viertejūt 2009. godu, stuosta grupys soliste i dzīšmu autore Guntra Kuzmina. “Leluokais lūluojums 2009. godā bez šaubom iz dzīsme “Bez Tevis” i tuos klipa filmeišona, kas beja adrenalins, smīkli i aizraujūšs ceļojums pa Latvejis mežim. Ar Goda koncertu censsamīs izkustynuot klauseituojus, par tū, ka uorā cīš solts i pozitivys emocejis niu cīši vādzeigys!”

Itūgod grupu „Borowa Mc” kluotīnē vēļ ir īspieja dzierdēt, apmeklejūt 19. decembrī Vacreigys literari muzykalū klubu „Četri Balti Krekli”, Vacpilsātys īlā 12 vokorā 22 stuņdēs.

Nu nakluotīnē pi sovom TV ekranim grupa “Borowa Mc” byus vārojama pasuocīņa “Latvejis Goda bolva sportā 2009” tīšraidē 23. decembrī 21:15, kur tei izpiļdeis leidz itam naatskaņuotu dzīsmi. Tys byus eipašs veltejums Latvejis sportistim.

„Sokom lelu paļdis vysim, kas stuodova kūpā ar mums ituo goda laikā, i caram iz tikpoš augleigu sadarbeibu ari jaunā godā. Vysu leluokais paļdis myusu muzykys klauseituojim, kurī myus lutynoj ar sovu podturiešnu i uzticeibu., “ uzsver Aigars. “2010. godā grupai “Borowa Mc” byus pīcu godu svātki. Vēļ nazynu kai, bet caru ka nūsvinēsim – kūpā ar myusu fanim i atbalsteituojim!”