Atzolys. Pasaceļt i liduot ir kotram dūts
Zynit, kas tymā ir pats lobuokais? Juos organizēja jaunīši jaunīšim – latgaliski, par latgalīšim i Latgolu.
Tī nabeja nivīnys prominencis, nivīnys aizmuguris, vystys spuorna i aizguodnīka. Nivīna pīredzis bogotuo voi gudrinīka. Vysi zali i sovi.
Nivīna deputata, ministrejis, departamenta i integracejis programys. Nivīnys leluos acs, plotuos rūkys voi garuo daguna.
Vacuokajam nu dorba grupys laikam beja knapi 24 godi. Jaunuokī beja gondreiž tikpat vaci kai poši seminara daleibnīki.
Deļkuo? A kuo ta nā? Ka tuo vajag koč pīcim cylvākim, tuo vajag. Izaruod, jaunajim vajag.
A cikom tuo vajag tev i maņ, mes byusim. Tys ir spāks, kas ir sevī i īt nu dzilīnis. Ka vajag, var kolnus guozt. Poši deļ seve, aiz sova namīra. Na cytu deļ, a deļ seve i apleicejūs.
Mani vysu vaira kaitynoj, kod ļauds Latgolys Studentu centram meklej politiskū aizmuguri i pamatus. Kai dūmuot, ka bez leluos politikys nikuo nav. Zvonuos, zondej, ļūžņoj.
Nav vīgli itymā laikā byut vīnkuorši NVO i īsavuiceit deļ seve turēt taisnu muguru, dūmuot i dareit. Byut pošam.
Kaidam pīsaslīt ir vīgļuok. Runuot kaida bolsā.
Byut atkareigam nu kaida ir gryušuok. Runuot kaida aizdavumā i pa juo pruotam.
Tok taišni itaida byušona pošam par sevi vuica vīnu byutisku lītu – struoduot pošam, dūmuot pošam i pošam runuot sovā bolsā. Niu i itymā sabīdreibā, laikā, ļaudīs.
Lels paļdis ituo goda “Atzolu” organizatorim, seviški Lindai, kas nanūsabeida pajimt itū vazumu iz seve! Paļdis dorba grupai, kas trokuoja i lēce leidza, dzīduoja, doncuoja i beja! Troki voi nu Rogovkys, Dagdys, Preiļu, Kuorsovys!
Labi zynu, ka nabeja vīgli. I nagulātūs nakšu, i sovys navariešonys, apleicejūs nagribiešonys deļ. Tok izadeve. Vēļ vīns sūleits iz prīšku.
Paļdis Kulturkapitala fondam, kas atbaļstēja itū pasuokumu. Ar jūs atbolstu “Atzolys” šūgod nūtyka 6. reizi piec kuortys i 6. godu piec kuortys tī, kam ir 15, 16, 17, 18, 19 godu, apsazynuoja sevi kai latgalīšus ar + zeimi: trokus, vierteigus, asūšus. Nu paguotnis ejūšus. Bogotus.
Partū ka latgalīts ir tikpat bogots kai vysi. Jam vyss ir dūts, tik na vysu jis par sevi, sovu volūdu i zemi zyna.
Nasokit maņ, ka gryuti laiki. Gryutums ir pošūs. Pasaceļt i liduot ir kotram dūts.
Maņ ruodīs, itaidi pasuokumi tū i vuica – byut pošam, byut stypram, atrast sovejūs, pasasmīt, padzīduot kūpā i pasaceļt jaunim dorbim, īšonom, byušonom, dzeivuošonai.