Atvasis
Munas bierneibas veitūly siermī,
Zori pi pošom saknem leikst…
Lauze jyuss vieji pošus pyrmūs –
Bet vīnolga atvasis deigst…
Kaids jau vīnumār prīkšā stuovēs
Tod, kod dzeives vīsuli skrīn.
Cyts otkon, viejim pasaļuovīs,
Slapstiesīs, mugoru lūceidams vīn…
Tai myusu Latvejai krysceļā guoja –
Beja, kas lyuze, kas klaniejuos.
Vīns ūtrs apryma, kaids preteim stuoja,
Cyty pi siles maniejuos…
Munas bierneibas veitūly siermī…
Rūkys bez spāka pi zemes sleigst.
Tikai vēļ redzēt, vēļ sajust kai pyrmuos
Jaunuos dzeives atvasis deigst..